आषाढ़ ११ गते, २०८३ मा प्रकाशित
काठमाडौँ । जारी फिफा फुटबल विश्वकप अन्तर्गत समूह एफको अन्तिम चरणका खेलहरू भोली बिहान हुँदैछन् । समूहको शीर्ष स्थान र अन्तिम ३२ टोलीको चरणमा स्थान सुनिश्चित गर्ने लक्ष्यका साथ नेदरल्यान्ड्स, जापान र स्विडेन मैदान उत्रँदा ट्युनिसिया भने प्रतिष्ठाका लागि मात्र खेल्नेछ ।
भोली बिहान नेपाली समय अनुसार ४: ४५ बजेदेखि नेदरल्यान्ड्स र ट्युनिसिया तथा जापान र स्विडेन आमने सामने हुदैछन् ।
नेदरल्यान्ड्स चार अंकसहित समूहको शीर्ष स्थानमा छ । जापानसँग २-२ को रोमाञ्चक बराबरी खेलेपछि नेदरल्यान्ड्सले दोस्रो खेलमा स्विडेनलाई ५-१ ले हराएर आफ्नो दाबेदारी बलियो बनाएको थियो । मुख्य फरवार्डका रूपमा अप्रत्याशित रूपमा अवसर पाएका ब्रायन ब्रोबेले दुई गोल गर्दै उत्कृष्ट प्रदर्शन गरेका थिए । नेदरल्यान्ड्सले हालसम्म २० प्रहारमध्ये ७ गोल गर्दै ३५ प्रतिशत सफलताको दर कायम गरेको छ, जुन विश्वकप इतिहासमै उसको उत्कृष्ट आक्रमणात्मक तथ्यांकमध्ये एक हो । इतिहास पनि नेदरल्यान्ड्सकै पक्षमा छ। तीन पटक विश्वकपको उपविजेता बनेको टोलीले समूह चरणका ३५ खेलमध्ये केवल दुई खेल मात्र हारेको छ।
अर्कोतर्फ, ट्युनिसियाको यात्रा लगभग समाप्त भइसकेको छ । पहिलो खेलमा स्विडेनसँग ५-१ ले पराजित भएपछि प्रशिक्षक साब्री लामुसीलाई बर्खास्त गरिएको थियो । उनको स्थानमा अफ्रिकी फुटबलका सफल प्रशिक्षक हर्भे रेनार्ड आए पनि टोलीमा सुधार देखिएको छैन । जापानसँगको खेलमा ट्युनिसियाले लक्ष्यतर्फ एकपटक पनि प्रहार गर्न सकेन र ४-० ले पराजित भयो । लगातार दुई खेलमा चार वा सोभन्दा बढी गोल अन्तरले हार्ने विश्वकप इतिहासको चौथो टोली बनेको ट्युनिसियालाई अब सम्मान जोगाउने चुनौती छ ।
नेदरल्यान्ड्सका कोडी गाक्पो समूह चरणमा पाँच गोल गरिसकेका छन् भने डेन्जेल डम्फ्रिसले अन्तर्राष्ट्रिय फुटबलमा २०औँ निर्णायक पास पूरा गरेका छन् । ब्रोबे, गाक्पो र डम्फ्रिसको संयोजन ट्युनिसियाका लागि ठूलो चुनौती बन्न सक्छ ।
त्यस्तै समूह एफको अर्को खेलमा जापान र स्विडेन आमनेसामने हुनेछन् । दुवै टोलीका लागि अन्तिम ३२ चरणको यात्रा सुनिश्चित गर्ने अवसर भएकाले यो खेल अत्यन्त महत्वपूर्ण मानिएको छ । जापान चार अंकसहित दोस्रो स्थानमा छ । नेदरल्यान्ड्ससँग २-२ को बराबरी खेलेपछि उसले ट्युनिसियामाथि ४-० को सहज जित निकालेको थियो । दाइची कामादा, आयासे उएदा र जुन्या इतो उत्कृष्ट लयमा देखिएका छन् । उएदाले हालसम्म दुई गोल र एक निर्णायक पास दिएका छन् । जापानका आठ फरक खेलाडीले गोलमा योगदान गरिसकेका छन्, जुन टोलीको विश्वकप इतिहासकै उत्कृष्ट उपलब्धिमध्ये एक हो ।
जापानले स्विडेनसँग हार टारे मात्र पनि विश्वकप समूह चरण अपराजित रूपमा पार गर्ने दोस्रो अवसर प्राप्त गर्नेछ । साथै सन् २०२२ यता युरोपेली टोलीविरुद्ध खेलेका चार विश्वकप खेलमा जापान अपराजित छ । स्विडेनले भने मिश्रित प्रदर्शन गरेको छ । पहिलो खेलमा ट्युनिसियालाई ५-१ ले हराएको टोली दोस्रो खेलमा नेदरल्यान्ड्ससँग समान अन्तरले पराजित भएको थियो । स्विडेनका मुख्य आशा अलेक्जान्डर इसाक हुन् । उनले एक गोल र तीन निर्णायक पास दिएका छन् । जापानको तीव्र आक्रमण रोक्न सके स्विडेनलाई अर्को चरण पुग्ने सम्भावना बलियो रहनेछ ।
यस समुहबाट अन्तिम ३२ चरणमा पुग्ने सम्भावना नेदरल्यान्ड्सको लगभग निश्चित छ र शीर्ष स्थानको बलियो दाबेदार देखिएको छ । त्यस्तै जापानले हार टारे अर्को चरणमा पुग्ने सम्भावना अत्यन्त बलियो छ । त्यसैगरी स्विडेनले जापानविरुद्ध जित निकालेमा सहज रूपमा अघि बढ्ने सम्भावना रहेको देखिन्छ भने ट्युनिसिया भने प्रतियोगिताबाट बाहिरिसकेको छ ।
अन्य समाचारहरु
