आषाढ़ २० गते, २०८३ मा प्रकाशित
काठमाडौं, २० असार । केप भर्डे विश्वकपको सबैभन्दा सानो राष्ट्र भए पनि उनीहरूले जारी फिफा विश्वकप २०२६ मा ठूलो प्रभाव छाडेर बाहिरिएका छन् ।
लियोनेल मेसी, क्रिस्टियानो रोनाल्डो, अर्लिङ हालान्ड र ह्यारी केनलाई बिर्साउने गरी यस प्रतियोगितामा पहिलो पटक सहभागी टोली नै अहिले विश्व चर्चाको केन्द्र बनिरहेको छ ।
स्पेनविरुद्ध पहिलो विश्वकप अंक जोड्दा गोलकिपर भोजिन्हाको बहादुरीपूर्ण प्रदर्शन देखिएको थियो भने उरुग्वेविरुद्ध पहिलो विश्वकप गोल गर्दाको रोमाञ्चकता पनि उतिकै थियो। अर्जेन्टिनासँगको खेलमा प्रतियोगिताकै सबैभन्दा ठूलो उलटफेर गर्ने संघारमा पुग्दा सिड्नी लोपेस काब्रालको उत्कृष्ट गोल गरेको पनि देखियो। केप भर्डेको विश्वकप यात्रामा यी सबै कुराहरू समेटिए पछि धेरैले उसलाई बिर्सन नसक्ने बताए ।
मियामीमा अतिरिक्त समयको खेल सकिने सिट्ठी बज्दा साविक विजेता अर्जेन्टिनासँग ३–२ को हृदयविदारक हारपछि ब्लु सार्क्सका खेलाडीहरू मैदानमा थकित जस्तो देखिएका थिए तर पनि उनीहरूले धेरैको मन जितेको महसुस गर्दै अमेरिकाबाट बिदा हुने भएका छन ।
बीबीसी रेडियो लाइभमा बोल्दै स्कटल्याण्डका पूर्व अन्तर्राष्ट्रिय खेलाडी जेम्स म्याकफ्याडेनले भने, ‘केप भर्डेले खेल हारेको छ तर उनीहरूले मानिसहरूको मनमा जित हासिल गरेका छन्, उनीहरूले साहस, सहकार्य, एकता र आफू को हुन् तथा के गर्न सक्छन् भन्नेमा अटल विश्वास प्रदर्शन गरेका छन्।’
अझ उनले भने, ‘यस प्रतियोगिताको मुख्य कथा नै केप भर्डे हो, फुटबल टोलीमा तपाईंले हेर्न चाहेको कुरा यही त हो।’
उनीहरू विश्व वरीयतामा ६७औँ स्थानमा रहेर प्रतियोगितामा आएका थिए तर समूह चरणमा तीन बराबरी नतिजा, जसमा युरोपेली च्याम्पियन स्पेनलाई पहिलो खेलमा गोलरहित बराबरीमा रोक्नु नै ठुलो कुरा भयो । जसले विश्वकप इतिहासकै सबैभन्दा ठूलो उलटफेर गर्ने प्रयासको विशाल चुनौती खडा गरेको थियो ।
अर्जेन्टिना विरुद्धको खेलमा मेसीको गोलले उनीहरू पछि परे तर खेललाई १–१ को बराबरीमा ल्याउँदै अतिरिक्त समयसम्म धकेल्न सफल भएका थिए त्यस पछि उनीहरू फेरि पछि परे तर काब्रालको उत्कृष्ट प्रहारले खेल पुनः बराबरीमा ल्यायो। यद्यपि, अन्त्यमा भने भाग्यले साथ दिएन, क्रिस्टियन रोमेरोको हेडर डिनी बोर्जेसको शरीरमा ठोक्किएर दिशा परिवर्तन हुँदा अर्जेन्टिना विजयी हुन पुग्यो ।
तर इङ्गल्याण्डका पूर्व राइट ब्याक ग्यारी नेभिलले आईटीभीलाई बताएअनुसार यो ‘अन्डरडग’ (कमजोर मानिएको टोली) द्वारा गरिएको सबैभन्दा उत्कृष्ट प्रदर्शनमध्ये एक थियो।
‘उनीहरू रोइरहेका छन् किनभने उनीहरू घर फर्किँदैछन्,’ उनले थपे, ‘खासमा उनीहरू घर जान चाहँदैनन्, उनीहरू जीवनभर यहीँ फुटबलमा रहन चाहन्छन्।’
उनले अगाडी भने, ‘उनीहरू सधैंभरि यहीँ रहन चाहन्छन्। यो यस्तो क्षण हो, जुन सायद यीमध्ये केही खेलाडीका लागि फेरि कहिल्यै आउने छैन। यो जादुमय छ तर उत्तिकै दुःखद पनि।’
अन्य समाचारहरु
