श्रावण ३ गते, २०८३ मा प्रकाशित
काठमाडौं, ०३ साउन । एनएमबि बैंकले डिजिटल बैंकिङ सेवालाई थप सरल, छिटो र सुरक्षित बनाउन नेपाल सरकारको सूचना प्रविधि विभागसँग सहकार्य गरेको छ। नयाँ सम्झौतापछि बैंकका ग्राहकहरूले नागरिक एपमार्फत अनलाइन बैंकिङका विभिन्न फाराम सहज रूपमा भर्न सक्नेछन्।
यस व्यवस्थाले ग्राहकले व्यक्तिगत विवरण बारम्बार हातैले प्रविष्ट गर्नुपर्ने झन्झट हट्ने, कागजी प्रक्रिया कम हुने तथा बैंकिङ सेवा थप छिटो र प्रभावकारी बन्ने बैंकले जनाएको छ। डिजिटल माध्यमबाट विवरण प्रमाणीकरण हुने भएकाले सेवा प्रवाहमा पनि सहजता आउने अपेक्षा गरिएको छ।
बैंकका अनुसार ग्राहकको गोपनीयता र सूचना सुरक्षालाई उच्च प्राथमिकता दिइएको छ। ग्राहकले नागरिक एपमार्फत स्पष्ट रूपमा अनुमति नदिएसम्म बैंकले कुनै पनि व्यक्तिगत विवरण हेर्न वा प्रयोग गर्न पाउने छैन। प्राप्त जानकारी पनि आवश्यक सेवा प्रदान गर्ने उद्देश्यका लागि मात्र प्रयोग गरिने व्यवस्था गरिएको छ।
एनएमबि बैंकले यो सहकार्यलाई नेपालको डिजिटल सार्वजनिक पूर्वाधारसँग बैंकिङ प्रणालीलाई जोड्ने महत्वपूर्ण पहलका रूपमा लिएको जनाएको छ। यसबाट देशभरका ग्राहकले सुरक्षित, सहज र झन्झटरहित डिजिटल बैंकिङ सेवा प्राप्त गर्ने विश्वास बैंकले व्यक्त गरेको छ।
अन्य समाचारहरु
