श्रावण ८ गते, २०८३ मा प्रकाशित
सञ्जय मिश्रा
रौतहट, ८ साउन। रौतहटको गुजरा नगरपालिका–५ हरिहरपुर टोलमा शुक्रबार बिहान भएको खुकुरी प्रहारको घटनामा एक महिलाको मृत्यु भएको छ।
घटनामा संलग्न आरोपितलाई स्थानीयवासीले नियन्त्रणमा लिएर कुटपिट गरेपछि उनी पनि गम्भीर घाइते भएका छन्।
जिल्ला प्रहरी कार्यालय रौतहटका प्रवक्ता प्रहरी नायब उपरीक्षक (डीएसपी) बसन्त गौतमका अनुसार बिहान करिब १०ः ३० बजे स्थानीय चन्देश्वर साह कलवारकी श्रीमती अन्दाजी ४०–४५ वर्षीया रेनुदेवी जयसवालमाथि धारिलो हतियार खुकुरी प्रहार गरिएको थियो। घाँटीमा गम्भीर चोट लागेका कारण उनको घटनास्थलमै मृत्यु भएको प्रहरीले जनाएको छ।
प्रहरीका अनुसार बाराको करैयामाई गाउँपालिका–८ इटहर बेलाही टोल स्थायी घर भई हाल गुजरा–५ हरिहरपुरमा बस्दै आएका न्दाजी ३५ वर्षीय उपेन्द्र साह कलवारले उक्त आक्रमण गरेका हुन्।
घटनापछि आक्रोशित स्थानीयले उपेन्द्रलाई नियन्त्रणमा लिएर कुटपिट गरेका थिए। गम्भीर घाइते भएका उनलाई उपचारका लागि चन्द्रपुर अस्पताल, चन्द्रनिगाहपुर लगिएको छ। उनको स्वास्थ्य अवस्था चिन्ताजनक रहेको प्रहरीले जनाएको छ।
घटनाको सूचना प्राप्त भएपछि इलाका प्रहरी कार्यालय लक्ष्मिनियाबाट प्रहरी निरीक्षक रादेशकुमार खत्रीको नेतृत्वमा टोली घटनास्थल पुगेको थियो। प्रहरीले घटनास्थलको मुचुल्का तथा अन्य कानुनी प्रक्रिया अघि बढाएको छ।
घटनाको कारण खुल्न बाँकी रहेको प्रहरीले जनाएको छ। घटनाका सबै पक्षबारे विस्तृत अनुसन्धान भइरहेको जिल्ला प्रहरी कार्यालय रौतहटले जनाएको छ।
अन्य समाचारहरु
