श्रावण १२ गते, २०८३ मा प्रकाशित
काठमाडौं, १२ साउन । अहिले खेलाडी सरुवाको समयमा भिनिसियस जुनियरको भविष्य भन्दा चाखलाग्दो अर्को कुनै विषय नहुन सक्छ।
रियल मड्रिडका यी फरवार्ड निस्सन्देह विश्वकै सर्वाधिक चर्चित फुटबलरहरूमध्ये एक हुन्, उनले गत साता सम्पन्न फिफा विश्वकप २०२६ मा ब्राजिलका लागि ३ उत्कृष्ट गोल हानेर पुनः आफुलाई प्रमाणित गरिसकेका छन ।
सन् २०१८ मा १८ वर्षको उमेरमा रियलमा आबद्ध भएका यी ब्राजिलियन खेलाडीले स्पेनिस क्लबका लागि ३७५ खेलमा १२८ गोल गर्नुका साथै १४ वटा उपाधि जितेको रेकर्ड रहेको छ । क्लबले उनलाई सम्झौताको अन्तिम वर्षमा प्रवेश गर्न दिएको कुरा सोच्दा नै अचम्म लाग्छ तर अहिलेको अवस्था यही हो।
यस क्षेत्रका जानकारहरूका अनुसार सामान्य परिस्थितिमा भिनिसियसको बजार मूल्य २० करोड पाउन्ड अर्थात २०० मिलियन पाउन्ड भन्दा बढी भएको अवस्था रहेको छ।
मैदानभित्रको कुरा गर्ने हो भने यति ठूलो रकममा तपाईंले विश्व स्तरीय ‘लेफ्ट विङ्गर’ अर्थात बायाँ तर्फबाट खेल्ने खेलाडी पाउन मुश्किल रहेको छ, जो मैदानको बीच भागमा अर्थात सेन्ट्रल पोजिसनमा पनि उत्तिकै कुशलतापूर्वक खेल्न सक्छन् र साथै २६ वर्षको उमेरमा आफ्नो खेल जीवनको उत्कृष्ट लयमा पुग्दै गरेका हुन्छन्।
मैदान बाहिरको कुरा गर्दा तपाईंले यस्तो विश्व प्रसिद्ध हस्तीलाई अनुबन्ध गर्नु हुने थियो, जसको व्यावसायिक मूल्य आर्थिक रूपमा निकै लाभदायक हुनेछ।
रियल मड्रिडले आफ्ना अट्याकरको सम्झौता नवीकरण गर्ने प्रयास गरेको छ र सोमबार उनीसँग थप वार्ता पनि गरेको छ तर अहिलेसम्म कुनै नतिजा निस्किएको छैन।
उनको सम्भावित उपलब्धताले आर्सनललाई सचेत गराएको छ । सम्झौता सम्बन्धी यो गतिरोधको फाइदा उठाउनेबारे आन्तरिक रूपमा विचार गरिरहेका क्लबहरूमध्ये आर्सनल पनि एक रहेको हो। साउदी अरबका टोलीहरूले पनि उनको स्थितिलाई नजिकबाट नियालिरहेका छन्।
आर्सनलका म्यानेजर मिकेल आर्टेटा प्रमाणित प्रतिभालाई अनुबन्ध गर्न चाहन्छन् र भिनिसियस यसका लागि उपयुक्त पात्र हुन्। चेल्सीका कारण मोर्गन रोजर्सलाई गुमाए पछि बायाँ तर्फबाट खेल्ने अट्याकरको खोजीमा रहेको आर्सनलले विचार गरिरहेका धेरै विकल्पहरूमध्ये उनी पनि एक हुन् भनी क्लब निकट स्रोतहरू बताएका छन।
यद्यपि, बीबीसी स्पोर्टका अनुसार आर्टेटा भिनिसियसलाई अनुबन्ध गर्ने विचारबाट यति धेरै प्रभावित भएका छन् कि क्लबभित्र उनलाई ‘नम्बर वान’ लक्ष्यका रूपमा हेरिएको छ। रोजर्सको मामलामा आर्सनलले अनुभव गरे जस्तै क्लबहरूले आफ्ना प्राथमिकताका खेलाडीहरूलाई अनुबन्ध गर्न सक्ने कुनै ग्यारेन्टी हुँदैन।
वास्तवमा, भिनिसियस जुनियरलाई भित्र्याउने सम्भावनाबारे आर्सनल यथार्थवादी छ। उनीहरूलाई थाहा छ कि यो निकै कठिन वा चुनौतीपूर्ण कार्य हो।
त्यसैगरी, भिनिसियस जुनियर निकट व्यक्तिहरूमा पनि आर्सनल जाने कदम कठिन हुने बुझाइ छ।
धेरैजसो दक्षिण अमेरिकी फुटबलरहरूका लागि रियल मड्रिड वा बार्सिलोनाका लागि खेल्नु जीवनभरको सपना हुन्छ। स्पेनको राजधानी छोड्नु, आर्सनलजस्तो प्रतिष्ठित क्लबका लागि भए पनि, बढीमा समान स्तरको अर्को कदमका रूपमा मात्र हेरिनेछ।
रियल विश्वकै सबैभन्दा ठूलो क्लब मानिने भएकाले छोड्दा खेलाडीको व्यावसायिक ब्रान्डमा पनि असर पर्ने बुझाइ छ।
अन्य समाचारहरु
