श्रावण १८ गते, २०८३ मा प्रकाशित
पटना, १८ साउन । जन सुराजका संस्थापक प्रशान्त किशोरले बांकीपुर उपनिर्वाचनमा शानदार जित हासिल गरेका छन्।
उनले १८,००० भन्दा बढी मतान्तरले भाजपाका नीरज सिन्हालाई पराजित गरे। प्रशान्त किशोरले ६३,२०३ मत प्राप्त गरे भने नीरज सिन्हाले ४४,२५० मत पाए। यसैबीच, आरजेडी उम्मेदवार रेखा कुमारीले १४,०८५ मत मात्रै प्राप्त गरिन्।
यस जितसँगै भाजपाले तीन दशकपछि यो सिट गुमाएको छ। बहालवाला भाजपा नेता नितिन नवीनले सन् २०२५ को विधानसभा निर्वाचनमा ५१,९३६ मतको अन्तरले यो सिट जितेका थिए, उनले राष्ट्रिय जनता दलकी उम्मेदवार रेखा कुमारीलाई पराजित गरेका थिए।
विजयका सन्दर्भमा प्रशान्त किशोरले भने, ‘जनताले आफ्नो राय र प्राथमिकताहरू व्यक्त गर्ने प्रयास गरेका छन्।’ बिजय पछि प्रशान्त किशोरले सम्राट चौधरीको आपराधिक पृष्ठभूमि रहेको र उनले मुख्यमन्त्रीजस्तो पद सम्हाल्न नहुने बताए। उनले भने, ‘हाम्रो माग यो छ कि बिहारको विकास यसरी गरियोस् जसले गर्दा राज्यबाट हुने बसाइँसराइको अन्त्य होस्। म भाजपाको केन्द्रीय नेतृत्वसँग बिहारको मुख्यमन्त्रीका रूपमा एक सक्षम नेतालाई नियुक्त गर्न आग्रह गर्दछु।’
यो सिट विगत तीन दशकदेखि भाजपाको कब्जामा रहँदै आएको छ तर अब यसमा प्रशान्त किशोरले आफ्नो प्रभाव विस्तार गरेका छन्। नितिन नवीन एक्लैले यो सिट ४ पटक जितेका छन्। सन् २०२० को निर्वाचनमा पनि भाजपाको प्रतिनिधित्व गर्दै नितिन नवीन नै विजयी भएका थिए, उनले कांग्रेसका उम्मेदवार शत्रुघ्न सिन्हाका छोरा लव सिन्हालाई ३९,००० मतको अन्तरले पराजित गरेका थिए।
सन् १९९५ देखि भाजपाले यो सिट जित्दै आएको छ। त्यसबेला यो ‘पटना पश्चिम’का रूपमा चिनिन्थ्यो। सन् २००८ मा निर्वाचन क्षेत्रको सीमांकनपछि यो ‘बांकीपुर’का रूपमा चिनिन थाल्यो।
सन् १९९५ देखि २००५ सम्म नितिन नवीनका पिता नवीन किशोरप्रसाद सिन्हाले भाजपाको प्रतिनिधित्व गर्दै लगातार यो सिट जितेका थिए। अर्को शब्दमा भन्नुपर्दा नितिन नवीनको परिवारले तीन दशकभन्दा बढी समयदेखि यो सिटमा आफ्नो पकड कायम राखिराखेको थियो ।
सन् २००५ को निर्वाचनमा विजयी भएपछि नवीन किशोर प्रसाद सिन्हाको निधन भयो। त्यसपछि सन् २००६ मा सोही सिटमा भएको उपनिर्वाचनमा नितिन नवीन विजयी भए, जसले उनको राजनीतिक यात्राको सुरुवात गर्यो। सन् २००६ को अप्रिलमा सम्पन्न उक्त उपनिर्वाचनमा नितिनले खसेको कुल मतको ८० प्रतिशतभन्दा बढी मत प्राप्त गरेका थिए ।
पटना जिल्लामा कुल १४ वटा विधानसभा निर्वाचन क्षेत्रहरू छन्। तीमध्ये बाँकीपुरलाई सबैभन्दा महत्त्वपूर्ण सिट मानिन्छ। बाँकीपुर अन्तर्गत राजेन्द्र नगर, मीठापुर, गर्दनिबाग, सचिवालय, कदमकुआँ, बोरिङ रोड र गान्धी मैदानजस्ता धेरै महत्त्वपूर्ण क्षेत्रहरू पर्दछन्। यस क्षेत्रमा कायस्थ समुदायको उल्लेखनीय बसोबास रहेको मानिन्छ।
अन्य समाचारहरु
