श्रावण १९ गते, २०८३ मा प्रकाशित
म्याड्रिड, १९ साउन । स्पेनको राष्ट्रिय अदालतले गत हप्ता सेउटामा भएको अभूतपूर्व सामूहिक सीमा प्रवेशको घटनाबारे प्रारम्भिक अनुसन्धान सुरु गरेको छ।
यसैबीच, मोरक्कोले यस संकटबारे आफ्नो पहिलो आधिकारिक प्रतिक्रिया दिँदै घटनाका लागि मानव तस्करीका सञ्जाल, अनलाइनमा फैलिएको गलत सूचना र स्पेनको सर्वोच्च अदालतको हालैको फैसलालाई लिएर सिर्जना भएको भ्रमलाई जिम्मेवार ठहर्याएको छ।
यो अनुसन्धान जुलाई ३० र ३१ का घटनाहरूसँग सम्बन्धित छ, जतिबेला अनुमानित ५०,००० देखि ६०,००० मानिसहरू मोरक्कोबाट उत्तर अफ्रिकी तटमा रहेको स्पेनको भू भाग सेउटामा प्रवेश गरेका थिए। स्पेनले घटनाका क्रममा आफ्नो सीमा क्षेत्रमा कम्तीमा ७२ जनाको मृत्यु भएको पुष्टि गरेको छ भने मोरक्कोका अधिकारीहरूले आफ्नो भू भागमा थप ११ जनाले ज्यान गुमाएको बताएका छन्।
स्पेनका न्यायिक निकायहरूले अनुसन्धान सुरु गरिरहँदा मोरक्कोले सीमा पार गर्ने घटना स्वतःस्फूर्त वा सरकारी संलग्नताका कारण भएको भन्ने दाबीलाई अस्वीकार गरेको छ । बरु यसका लागि स्पेनको सर्वोच्च अदालतको फैसला, संगठित आपराधिक गतिविधि र अनलाइनमा फैलाइएका गलत सूचनाहरूको संयोजनलाई जिम्मेवार ठहराएको छ।
मोरक्कन सञ्चारमाध्यमहरूमा प्रकाशित गृह मन्त्रालयको विज्ञप्तिमा सरकारी प्रवक्ताले बताएअनुसार यो संकट डिजिटल क्षेत्रको दुर्भावनापूर्ण उपयोग र मानव तस्करी सञ्जालका गतिविधिहरू तथा स्पेनका न्यायिक निकायहरूका हालैका निर्णयहरूसँगै फैलाइएका भ्रामक सूचना र गलत व्याख्याहरूका कारण उत्पन्न भएको हो।
रबातका अनुसार, ‘तत्काल फिर्ता नपठाउने’ सम्बन्धी स्पेनको सर्वोच्च अदालतको हालैको फैसलाका बारेमा व्यापक रूपमा फैलिएको गलत बुझाइले गर्दा केही सम्भावित आप्रवासीहरूमा यस्तो धारणा बन्यो कि स्पेनको भूभागमा प्रवेश गरेपछि उनीहरूलाई तुरुन्तै फिर्ता पठाइने छैन।
‘जुस्टिसिया युरोपा’ नामक राजनीतिक दलले दर्ता गराएको उजुरीमा सम्भावित आपराधिक कसुरका पर्याप्त संकेतहरू देखिएको निष्कर्ष निकाल्दै न्यायाधीश मारिया टार्डोनले छानबिनको आदेश दिएकी छिन् । उनले स्पेनको राष्ट्रिय प्रहरीलाई यो सामूहिक प्रवेश आपराधिक समूह वा अन्य बाह्य पक्षहरूद्वारा संगठित वा निर्देशित थियो कि थिएन भन्ने कुरा पत्ता लगाउन निर्देशन दिएकी हुन् ।
न्यायाधीशको आदेशमा स्पेनको फौजदारी संहिताको ‘शीर्षक २३’ अन्तर्गत राज्यको शान्ति वा स्वतन्त्रता विरुद्धका सम्भावित कसुरहरूको उल्लेख गरिएको छ। यसले अनुसन्धानकर्ताहरूले उक्त कार्यमा आपराधिक तस्करी सञ्जालभन्दा बाहिरका पक्षहरूको पनि संलग्नता थियो कि भन्नेबारे जाँच गर्ने संकेत गर्छ। उल्लेख गरिएको कानुनी प्रावधानले प्रमाण फेला परेको खण्डमा मोरक्कोका राज्य अधिकारीहरू वा राबात सरकारसँग सम्बन्धित व्यक्तिहरूसँगको सम्भावित साँठगाँठबारे अनुसन्धान गर्ने सम्भावनालाई पनि खुला राखेको छ।
उता, मोरक्को सरकारले आपतकालीन स्थितिको व्यवस्थापनमा आफूले अपनाएको तरिकाको बचाउ गर्दै भन्यो कि उसले सक्रिय र विस्तृत दृष्टिकोण अपनाएको थियो। यो दृष्टिकोण समयमै जानकारी लिने, सतर्कता र परिचालन बढाउने तथा विभिन्न सुरक्षा निकाय र स्थानीय अधिकारीहरूबीच तयारीलाई सुदृढ पार्ने कुरामा आधारित थियो।
मोरोक्को सरकारले भन्यो कि ती उपायहरूले अधिकारीहरूलाई घटनाक्रम व्यवस्थापन गर्न, जीवन रक्षा गर्न, सार्वजनिक व्यवस्था कायम राख्न र सीमा सुरक्षित गर्नु मद्दत गरेका थिए । साथै, हस्तक्षेपका क्रममा कानुनी प्रावधान र समानुपातिकताको सिद्धान्तको कडाइका साथ पालना गरिएको थियो।
मोरक्कोका अधिकारीहरूले सीमा पार गर्ने प्रयासमा संलग्न मानिसहरूको संख्या करिब ४० हजार रहेको बताए, जुन स्पेनको ५० हजार देखि ६० हजार सम्मको अनुमानभन्दा कम हो।
गृह मन्त्रालयका अनुसार मोरक्कोको भू भागमा ११ जनाको मृत्यु भएको पुष्टि गर्दै बतायो कि १० जना डुबेर मरे भने अर्का एक जनाको सेउटा सहर नजिकैको चट्टानी क्षेत्रबाट खसेर मृत्यु भएको छ।
मोरक्को सरकारले भन्यो कि उसले प्रभावित मानिसहरूको वास्तविक संख्या, उनीहरूको पहिचान र राष्ट्रियता यकिन गर्न स्पेनका अधिकारीहरूसँग मिलेर काम गरिरहेको छ ताकि आवश्यक कानुनी, प्रशासनिक र मानवीय प्रक्रियाहरू पूरा गर्नु सकियोस्।
मोरक्को सरकारले अन्त्यमा जोड दिँदै भन्यो कि अनियमित आप्रवासनको समस्यालाई साझा जिम्मेवारी, वास्तविक ऐक्यबद्धता र बोझको न्यायोचित बाँडफाँडमा आधारित विस्तृत दृष्टिकोणको दायराभित्र मात्र समाधान गर्न सकिन्छ।
उसले थप्यो कि ‘मोरक्को आफ्ना साझेदारहरूको अपेक्षा अनुरूप एक भरपर्दो र जिम्मेवार साझेदार रहिरहनेछ र अनियमित आप्रवासन तथा मानव तस्करीविरुद्धको लडाइँमा अन्तर्राष्ट्रिय सहयोग र समन्वय सुदृढ गर्न प्रतिबद्ध रहनेछ।’
यसैबीच, उसले भन्यो कि देशले ‘कानुनी शासनको दायराभित्र र अधिराज्यको राष्ट्रिय तथा अन्तर्राष्ट्रिय दायित्वहरू बमोजिम सार्वजनिक व्यवस्थाको रक्षा गर्न, सीमा सुरक्षा सुनिश्चित गर्न तथा मानिस र सम्पत्तिको सुरक्षा सुनिश्चित गर्न आवश्यक सबै उपायहरूु अपनाइरहनेछ।
अन्य समाचारहरु
