श्रावण २३ गते, २०८३ मा प्रकाशित
बाेगटा, २३ साउन । विश्व फुटबलको सर्वोच्च निकाय संकटको घेरामा परेका बेला कोलम्बियाको भ्रमणमा रहेका फिफा अध्यक्ष जियानी इन्फान्टिनोले दक्षिण अमेरिकाका कयौं प्रमुख फुटबल हस्तीहरूको साथ पाएका छन्।
कट्टर दक्षिणपन्थी राष्ट्रपति एबेलार्डो डे ला एस्प्रिएलाको पदभार ग्रहण समारोहमा सहभागी हुन इन्फान्टिनो शुक्रबार बिहान कोलम्बियाको काली सहर पुगेका हुन्।
कोलम्बियाली फुटबल महासंघद्वारा सार्वजनिक तस्बिरहरूमा इन्फान्टिनो मुस्कुराउँदै दक्षिण अमेरिकी फुटबल महासंघका अध्यक्ष अलेजान्ड्रो डोमिन्गुएज र कोलम्बियाली महासंघका अध्यक्ष रामोन जेसुरुनसँग उभिएको देखिन्छ।
विश्व फुटबलका प्रमुख इन्फान्टिनो निजी लगानीका लागि विश्वकप खुला गर्ने व्यापक आलोचना भएको र अन्ततः परित्याग गरिएको योजनाका कारण विवादमा फसेको समयमा यो कोलम्बिया भ्रमण भएको हो।
सन् २०१६ देखि पद सम्हाल्दै आएका ५६ वर्षीय इटालियन स्विस वकिलले फिफाका समस्याहरू समाधान भए वा भएनन् भन्नेबारे पत्रकारले सोधेको प्रश्नको जवाफ दिन अस्वीकार गरेका छन्।
कालीसहर स्थित एक खेल परिसरमा आयोजित बालबालिकाको फुटबल महोत्सवमा सहभागी हुँदा उनले उक्त कार्यक्रममा उपस्थित हुन पाएकोमा आफ्नो खुसी व्यक्त भने गरेका थिए ।
‘आज यहाँ आउन पाउँदा खुसी लागेको छ,’ फिफा प्रमुखले फुटबलको पोसाक लगाएका दर्जनौं बालबालिकासँग भने, ‘फुटबल आनन्द हो, फुटबल खुसी हो, फुटबल एकता हो ।’ साथै, उनले सो क्रममा विश्वको यस भागमा, दक्षिण अमेरिकाको कोलम्बियालगायतको यस क्षेत्रमा, धेरै च्याम्पियनहरू जन्मिएको कुरा पनि उल्लेख गरेका थिए।
आगामी मार्चमा राबातमा हुने फिफा अध्यक्षको निर्वाचनमा चौथो तथा अन्तिम कार्यकालका लागि उम्मेदवारी दिने तयारीमा रहेका इन्फान्टिनो आलोचनाको घेरामा परिरहेका छन्।
विशेषगरी युरोपेली निकाय ‘युइएफए’ले उनको आलोचना गरिरहेको छ, खासमा फिफाले निजी लगानीको प्रस्ताव फिर्ता लिए पनि युइएफएले विश्वकप बहिष्कार गर्ने आफ्नो अडान कायमै राखेको छ।
फिफासँग आबद्ध १० सदस्य मात्र भए पनि अर्जेन्टिना र ब्राजिलजस्ता चर्चित फुटबल संघहरू समावेश रहेको ‘कोनमेबोल’ ले बिहीबार फिफाद्वारा बारम्बार लिइएका एकपक्षीय निर्णयहरू प्रति आफ्नो चिन्ता व्यक्त गरेको थियो। तर, शुक्रबार कोलम्बियाको एक सञ्चारमाध्यमले सोधेको प्रश्नको जवाफमा कोनमेबोलका अध्यक्षले इन्फान्टिनोले गरेका ‘महत्त्वपूर्ण कामलाई बेवास्ता गर्न नसकिने’ बताए।
‘हामीले संवादमार्फत फुटबलको हितमा काम गरिरहनु पर्छ, सधैं सबै कुरामा सहमत हुनैपर्छ भन्ने छैन,’ डोमिन्गुएजले भने।
बिहीबार शक्तिशाली अर्जेन्टिनी फुटबल संघ र पाराग्वेको फुटबल संघले समर्थन जनाए पछि शुक्रबार इन्फान्टिनोले दक्षिण अमेरिकाका अन्य दुई संघहरू भेनेजुएला र इक्वेडरबाट पनि समर्थन प्राप्त गरेका छन्।
आफ्नो महासंघको विज्ञप्ति अनुरूप उनीहरूले निजी लगानीकर्ताहरूका लागि खुला रहने ‘फिफा फर्वार्ड इन्टरप्राइज’ नामक व्यावसायिक संस्था स्थापना गर्ने विवादास्पद योजना फिर्ता लिइएकोमा स्वागत गरे।
फिफा प्रमुखलाई लेखिएको पत्रमा इक्वेडरको फुटबल महासंघका अध्यक्ष फ्रान्सिस्को एगास लारेटेगुईले इन्फान्टिनो प्रति हाम्रो खेलको हितका लागि निरन्तर काम गरिरहेका फुटबलका वर्तमान नेतृत्वकर्ताहरू प्रति आफू विश्वस्त रहेको उल्लेख गरेका छन् ।
अमेरिकी राष्ट्रपति डोनाल्ड ट्रम्पजस्ता दक्षिणपन्थी राजनीतिक व्यक्तित्वहरूसँग निकट सम्बन्ध राख्ने इन्फान्टिनोले शुक्रबार अबेर डे ला एस्प्रिएलाको राष्ट्रपतीय शपथ ग्रहण समारोहमा सहभागिता जनाए पछि उनी प्रति दक्षिण अमेरिका राष्ट्रहरू लचिलो देखिएका छन् ।
कोलम्बियाका नवनिर्वाचित नेताले बोगोटास्थित संसद भवनको सट्टा ‘साल्सा नृत्यको राजधानी’ मानिने काली सहरमा समारोह आयोजना गर्ने निर्णय गरेर परम्परा तोडेका छन्।
अन्य समाचारहरु
