डिएनए नमूना सङ्कलनपछि चितवनमा थप २८० शव सुरक्षित रूपमा व्यवस्थापन

नारायणगढ । रसुवाको भोटेकोशी नदीमा आएको भीषण बाढीपछि त्रिशूली र नारायणी नदीका तटीय क्षेत्रमा फेला परेका शवमध्ये २८० शवको फरेन्सिक परीक्षण तथा डिएनए नमूना सङ्कलन गरी चितवनको देवघाटस्थित व्यवस्थापनस्थलमा सुरक्षित रूपमा व्यवस्थापन गरिएको छ।

भरतपुर अस्पतालका प्रवक्ता डा. रामप्रसाद सापकोटाका अनुसार भदौ १० गते रातिदेखि सुरक्षाकर्मीले त्रिशूली नदीबाट संकलन गरेका शव अस्पतालमा ल्याएर संरक्षण गरिएको थियो। भदौ ११ गते बिहानदेखि फरेन्सिक विज्ञको नेतृत्वमा चिकित्सक टोली परिचालन गरी शव पहिचानका लागि आवश्यक फरेन्सिक परीक्षण, डिएनए तथा अन्य जैविक नमूना सङ्कलन र अभिलेखीकरणको काम सुरु गरिएको हो।

जिल्ला प्रहरी कार्यालय चितवनका प्रमुख प्रहरी उपरीक्षक रामेश्वर पौडेलका अनुसार त्रिशूली र नारायणी नदीबाट हालसम्म ३२१ शव संकलन गरिएको छ। तीमध्ये १२ शवको सनाखत भई आफन्तले बुझिसकेका छन्।

संकलित शवमध्ये ६६ महिला, ११६ पुरुष, ७ बालक, ६ बालिका रहेका छन् भने १२६ शवको पहिचान खुल्न सकेको छैन वा अवस्था स्पष्ट हुन सकेको छैन।

प्रहरीका अनुसार भविष्यमा पहिचान गर्न सकिने गरी अन्तर्राष्ट्रिय मापदण्डअनुसार डिएनए नमूना तथा आवश्यक अभिलेख राखेर देवघाटस्थित व्यवस्थापनस्थलमा शवहरू सुरक्षित रूपमा व्यवस्थापन गरिएको हो।

भदौ १३ गते ९६ शव, भदौ १४ गते १०३ शव र भदौ १५ गते ८१ शव व्यवस्थापन गरिएको प्रहरीले जनाएको छ।

प्रहरी उपरीक्षक पौडेलका अनुसार नदी किनारमा बेपत्ता तथा शव खोज्ने कार्य अझै दैनिक रूपमा जारी छ। नदीबाट फेला पर्ने शवलाई भरतपुर अस्पताल ल्याई फरेन्सिक परीक्षण तथा डिएनए नमूना सङ्कलन गरेपछि देवघाटस्थित व्यवस्थापनस्थलमा सुरक्षित रूपमा व्यवस्थापन गर्ने कार्य निरन्तर भइरहेको छ।