क्षेत्रीय सुरक्षा र सहयोगका लागि नयाँ संरचनाको अभ्यासः टर्की, साउदी अरब र पाकिस्तानबीच रक्षा गठबन्धन

टर्कीका विदेशमन्त्री हाकान फिदानले यस क्षेत्रमा ‘नयाँ सुरक्षा र सहयोग संरचना’ निर्माणको प्रक्रिया शुरु भएको बताउनुभएको छ । टर्की, साउदी अरब र पाकिस्तान सम्मिलित संयुक्त रक्षा समितिको उद्घाटन बैठक सम्पन्न भएपछि विदेशमन्त्री फिदानले यस्तो घोषणा गर्नुभएको हो ।

‘मक्का रक्षा गठबन्धन’ को रणनीतिक, राजनीतिक तथा रक्षा समितिको पहिलो बैठकलाई सम्बोधन गर्दै विदेशमन्त्री फिदानले क्षेत्रीय शान्ति, सुरक्षा र स्थिरताका लागि जिम्मेवारी बहन गर्न आफूहरू तयार रहेको बताउनु भयो । उहाँले भन्नुभयो, ‘आजको यस बैठकले क्षेत्रीय स्थिरताका लागि हाम्रो तत्परता प्रदर्शन गरेको छ । हामी पाकिस्तान र साउदी अरबजस्ता मित्र राष्ट्रहरूसँगको घनिष्ठ सहयोग र समन्वयलाई निरन्तरता दिनेछौँ ।’

उक्त रक्षा सम्झौता अन्य क्षेत्रीय देशहरूका लागि पनि खुला रहने बताइएको छ । यद्यपि, नयाँ सदस्यहरूलाई समावेश गर्नुअघि एक सुदृढ संस्थागत आधार तयार गरी क्रमिक रूपमा विस्तार गरिने विदेशमन्त्री फिदानले स्पष्ट पार्नुभयो ।
गठबन्धनको उद्देश्यबारे प्रष्ट पार्दै उहाँले थप्नुभयो, ‘यो गठबन्धन कुनै पनि देशको विरुद्ध लक्षित छैन । बरु, हाम्रा आधारभूत सिद्धान्तहरूलाई आत्मसात गर्ने यस क्षेत्रका सबै राष्ट्रहरूका लागि यो खुला छ । सम्झौताको मर्म र सिद्धान्त साझा गर्ने अन्य मित्र राष्ट्रहरूसँग मिलेर शान्तिपूर्ण परिकल्पनालाई अगाडि बढाउने हाम्रो साझा चाहना हो ।’

यस ऐतिहासिक सम्झौतामा गत अगस्ट ७ तारिखका दिन मक्कामा हस्ताक्षर गरिएको थियो। सम्झौतामा साउदी अरबका युवराज तथा प्रधानमन्त्री मोहम्मद बिन सलमान बिन अब्दुलअजीज अल साउद, टर्कीका राष्ट्रपति रेसेप तैयप एर्दोगान र पाकिस्तानका प्रधानमन्त्री मुहम्मद शहबाज शरीफले हस्ताक्षर गर्नुभएको थियो ।

बढ्दो क्षेत्रीय र विश्वव्यापी अस्थिरताका बीच तीन देशबीचको ‘संयुक्त निवारण’ क्षमतालाई सुदृढ बनाउनु यस सम्झौताको मुख्य लक्ष्य रहेको छ । सम्झौताको प्रावधान अनुसार, कुनै एक हस्ताक्षरकर्ता राष्ट्रमाथि हुने आक्रमणलाई तीनवटै देशमाथिको आक्रमण मानिने व्यवस्था गरिएको छ ।