आश्विन १ गते, २०८३ मा प्रकाशित
कपिलवस्तु, ३१ भदौ । कपिलवस्तुको बाणगंगा नगरपालिका–४ स्थित चारनम्बर-तौलिहवा सडक खण्डमा दुई वटा स्कुटी आपसमा ठोकिँदा एक जनाको मृत्यु भएको छ भने दुई जना घाइते भएका छन्।
बुधबार साँझ करिब ४ बजे गजेहडाबाट सिउटीतर्फ जाँदै गरेको लु प्र ०१–०१२ प १२६५ नम्बरको स्कुटीले अगाडि रहेको ट्याक्टरलाई ओभरटेक गर्ने क्रममा विपरीत दिशाबाट आउँदै गरेको लु प्र ०१–००९ प २४०२ नम्बरको ई–स्कुटीसँग ठोक्किएको थियो।
दुर्घटनामा स्कुटी चालक रुपन्देहीको कञ्चन गाउँपालिका–५ भैसाही निवासी २७ वर्षीय रुद्रनारायण थारु गम्भीर घाइते भएका थिए। उनलाई उपचारका लागि पिपरा अस्पताल लगिएकोमा चिकित्सकले साँझ ४:५० बजे मृत घोषणा गरेका हुन्।
दुर्घटनामा इ-स्कुटी चालक बाणगंगा–८ बोडगाउँकी ३५ वर्षीया रेखा घिमिरे र ट्याक्टर चालक बाणगंगा–११ मैरीका ३५ वर्षीय बमबहादुर चौधरी घाइते भएका छन्। घिमिरेको युनाइटेड अस्पतालमा उपचार भइरहेको जिल्ला ट्राफिक प्रहरी कार्यालय कपिलवस्तुका प्रमुख प्रहरी निरीक्षक राजन ढकालले जानकारी दिए।
अन्य समाचारहरु
