आश्विन १ गते, २०८३ मा प्रकाशित
काठमाडौं । सञ्चारमन्त्री डा. विक्रम तिमिल्सिनाले सुरक्षण मुद्रणमा नेपाललाई आत्मनिर्भर बनाउँदै अन्तर्राष्ट्रिय बजारमा समेत पहुँच विस्तार गर्न सकिने बताएका छन् ।
बिहीबार आयोजित विज्ञहरूको अनुभव आदानप्रदान कार्यक्रममा उनले राहदानी, परिचयपत्र, राजस्वसम्बन्धी कागजातलगायत सुरक्षण सामग्री स्वदेशमै उत्पादन गर्न सुरक्षण मुद्रण केन्द्रलाई सक्षम र व्यावसायिक बनाउनुपर्ने बताए ।
उनले आधुनिक प्रविधि, अन्तर्राष्ट्रिय सुरक्षा मापदण्ड र दक्ष जनशक्ति विकास गर्दै केन्द्रलाई प्रतिस्पर्धी बनाउनुपर्नेमा जोड दिए। कार्यक्रममा विज्ञहरूले प्रविधि, सुरक्षा प्रणाली, नक्कली कागजात नियन्त्रण, अन्तर्राष्ट्रिय साझेदारी र बजार विस्तारका सम्भावनाबारे अनुभव साझा गरेका थिए ।
कार्यक्रममा सुरक्षण मुद्रणमा प्रयोग हुने कागज, कार्ड र डिजिटल प्रविधिमा पछिल्लो समय भइरहेको विकासबारे पनि छलफल भएको थियो । विशेषगरी नक्कली कागजातका कारण राज्य तथा नागरिकलाई पुग्ने क्षति कम गर्न आधुनिक प्रविधि र बहुस्तरीय सुरक्षा प्रणाली आवश्यक हुने विषयमा विज्ञहरूले जोड दिएका थिए । त्यसैगरी सुरक्षण मुद्रणमा अन्तर्राष्ट्रिय सुरक्षा मापदण्ड पूरा गर्ने, नमुना परीक्षण गर्ने र उत्पादनलाई आवश्यक मापदण्डअनुसार प्रमाणीकरण तथा अनुपालन गर्ने विषयमा छलफल भएको थियो ।
अन्य समाचारहरु
