आश्विन ३ गते, २०८३ मा प्रकाशित
इण्डोनेसियाले बढ्दो फोहोर व्यवस्थापन चुनौती समाधान गर्दै हरित ऊर्जा उत्पादन गर्ने उद्देश्यले पश्चिम जाभा प्रान्तको बोगोरमा ठूलो ‘वेस्––टु–एनर्जी’ परियोजनाको निर्माण शुरु गरेको छ । बोगोर राया–१ वेस्ट–टु–एनर्जी परियोजनाको शिलान्यास बोगोर रीजेन्सीको चिबुङबुलाङ जिल्लामा गरिएको हो ।
इण्डोनेसियाको सार्वभौम सम्पती कोष दानान्तारा र सरकारको सहकार्यमा निर्माण हुने परियोजनामा चिनियाँ वातावरणीय कम्पनी झेजियाङ वेमिङ इन्भाइरोन्मेन्ट प्रोटेक्सन कम्पनी लिमिटेडको प्रविधि प्रयोग गरिनेछ । परियोजनामा करिव २.८ ट्रिलियन इण्डोनेसियाली (१५ करोड ७८ लाख अमेरिकी डलर) लगानी हुने बताइएको छ । यसअन्तर्गत फोहोर जलाएर ऊर्जा उत्पादन गर्ने दुईवटा लाइन निर्माण गरिनेछन्, जसको संयुक्त क्षमता वार्षिक ५ लाख ४७ हजार ५०० टन फोहोर प्रशोधन गर्ने हुनेछ ।
परियोजनाबाट करिव १ हजार २०० रोजगारी सिर्जना हुने र फोहोर विसर्जनका लागि ल्यान्डफिलमाथिको निर्भरता घट्ने अपेक्षा गरिएको छ ।
दानान्तारा इन्भेस्टमेन्ट म्यानेजमेन्टका प्रमुख कार्यकारी अधिकृत पान्डु स्यारिरका अनुसार परियोजनाले ग्रेटर बोगोर क्षेत्रका १ लाखभन्दा बढी घरपरिवारलाई विद्युत् आपूर्ति गर्न पुग्ने हरित ऊर्जा उत्पादन गर्नेछ । उनले परियोजनाले वार्षिक ५ लाख टनभन्दा बढी फोहोर प्रशोधन गर्ने र यो बोगोर सहर तथा बोगोर रीजेन्सीबाट उत्पादन हुने प्रशोधनयोग्य फोहोरको करिव ४५ प्रतिशत बराबर हुने बताए ।
परियोजनाले ल्यान्डफिलबाट हुने फोहोरसम्बन्धी उत्सर्जनलाई ८० प्रतिशतसम्म घटाउने तथा वार्षिक करिव ६ लाख ४० हजार टन कार्बन डाइअक्साइड बराबरको उत्सर्जन कटौती गर्ने अपेक्षा गरिएको छ ।
अन्य समाचारहरु
