आश्विन ५ गते, २०८३ मा प्रकाशित
यमनको हुथी समूहले साउदी अरबको राजधानी रियाद र पश्चिमी तटीय शहर यान्बुस्थित साउदी तेल कम्पनी अराम्कोको एक केन्द्रलाई लक्षित गरी क्षेप्यास्त्र तथा ड्रोन आक्रमण गरेको दाबी गरेको छ । हुथी समूहद्वारा सञ्चालित अल–मसिराह टेलिभिजनमार्फत सैन्य प्रवक्ता याह्या सरियाले विज्ञप्ति जारी गर्दै ठूलो संख्यामा ब्यालेस्टिक तथा क्रुज क्षेप्यास्त्र र ड्रोन प्रयोग गरेर दुईवटा सैन्य कारबाही गरिएको बताउनुभएको हो ।
उहाँकाअनुसार पहिलो आक्रमण रियादका केही संवेदनशील स्थानलाई लक्षित गरिएको थियो भने दोस्रो आक्रमण लालसागरको तटमा रहेको प्रमुख औद्योगिक तथा ऊर्जा केन्द्र यान्बुस्थित अराम्कोका संरचनालाई लक्षित गरिएको थियो । सरियाले दुवै आक्रमणले आफ्नो लक्ष्य सफलतापूर्वक प्रहार गरेको दाबी गरेका छन् ।
शनिवार रियादमा दुईपटक विस्फोटको आवाज सुनिएको थियो । दोस्रो घटनापछि राजधानीको उत्तरपूर्वमा रहेको किङ खालिद अन्तर्राष्ट्रिय विमानस्थलनजिक धुवाँको मुस्लो देखिएको बताइएको छ । घटनाका कारण केही उडानमा ढिलाइ भएको थियो । साउदी अधिकारीहरूले यसअघि रियादका लागि हवाई खतराको चेतावनी जारी गरेका थिए ।
पछि खतरा टरेको घोषणा गरिएको थियो ।
हालै हुथी समूह र साउदी अरबबीच तनाव बढेपछि रियादका लागि जारी गरिएको यो पहिलो हवाई खतरा चेतावनी भएको बताइएको छ ।
हुथी सैन्य प्रवक्ता सरियाले आफूहरूले जानाजानी सर्वसाधारणलाई लक्षित नगरेको दाबी गर्नुभयो । उहाँकाअनुसार यमनमा हुथी समूहको नियन्त्रणमा रहेका क्षेत्रमा साउदी अरबले हवाई आक्रमण तीव्र बनाएपछि त्यसको जवाफस्वरूप रियादमाथि आक्रमण गरिएको हो । उहाँले साउदी हवाई आक्रमण बन्द नभएसम्म र यमनमाथिका प्रतिवन्ध हटाइएसम्म आक्रमणको जवाफ आक्रमणबाट दिने रणनीतिअन्तर्गत कारबाही जारी राख्ने चेतावनी दिनुभयो ।
यसैबीच, साउदी नेतृत्वको गठबन्धनले रियादलाई लक्षित गरी प्रहार गरिएको हुथी ब्यालेस्टिक क्षेप्यास्त्रलाई हवाई प्रतिरक्षा प्रणालीले रोकेर नष्ट गरेको जनाएको छ ।
गठबन्धनका प्रवक्ता तुर्की अल–मालिकीका अनुसार बाइस, ताइफ, फरासान र यान्बुलाई लक्षित अन्य आक्रमणका प्रयाससमेत विफल पारिएको थियो । उहाँले हुथी आक्रमणले सर्वसाधारण तथा नागरिक संरचनालाई लक्षित गरेको आरोप लगाउँदै भविष्यमा यस्ता आक्रमण रोक्न आवश्यक कदम चालिने चेतावनी दिनुभयो । आक्रमण र त्यसबाट भएको क्षतिको स्वतन्त्र पुष्टि भने तत्काल हुन सकेको छैन ।
अन्य समाचारहरु
