आश्विन १६ गते, २०८३ मा प्रकाशित
काठमाडौं, १६ असोज । मुख्य प्रशिक्षक जर्ज जेसससँगको तनावपूर्ण मतभेदपछि कप्तान क्रिस्टियानो रोनाल्डोले कोपनहेगनस्थित प्रशिक्षण शिविर छोडेसँगै पोर्चुगलको राष्ट्रिय टोलीमा हलचल मच्चिएको छ।
सामाजिक सञ्जालमार्फत रोनाल्डोले राष्ट्रिय टोलीको शिविर छोड्ने आफ्नो निर्णय सार्वजनिक गर्दै पोर्चुगिज फुटबल महासंघका अध्यक्ष पेड्रो प्रोएन्कासँगको कुराकानीपछि यो निर्णय लिइएको बताएका छन्।
यस विवादको सम्पूर्ण विवरण बताउने प्रतिबद्धता जनाउँदै रोनाल्डोले उपयुक्त समयमा सत्य कुरा बाहिर ल्याउने वाचा गरेका छन्। यद्यपि, युरोपेली सञ्चारमाध्यमहरूले भने रोनाल्डो, पोर्चुगलका प्रशिक्षक जर्ज जेसस र महासंघका अध्यक्षबीच के-कस्तो घटनाक्रम भयो भन्नेबारे भित्री विवरणहरू सार्वजनिक गर्न थालिसकेका छन्। यस नाटकीय घटनाक्रमले राष्ट्रिय टोलीमा अनुभवी फरवार्डको भूमिका र प्रशिक्षक टोलीसँगको उनको सम्बन्धबारे तीव्र बहसलाई पुनः ब्युँताएको छ।
सामाजिक सञ्जालमार्फत रोनाल्डोले लेखे: “राष्ट्रिय टोलीका प्रशिक्षकको पत्रकार सम्मेलन र पोर्चुगिज फुटबल महासंघका अध्यक्षसँगको कुराकानी पछि मैले राष्ट्रिय टोलीको क्याम्प छोड्ने निर्णय गरेँ। आफूले सधैँ पूर्ण निष्ठाका साथ सेवा गरेको राष्ट्रिय टोलीबाट बाहिरिनुको कारणबारे म उपयुक्त समयमा सम्पूर्ण पोर्चुगिज जनतालाई सत्य कुरा बताउनेछु। अहिले भने पोर्चुगल र मेरा सबै सहकर्मीहरूलाई, बिना कुनै अपवाद, शुभकामना दिने बेला हो।”
विवादको सुरुवात कसरी भयो?
पोर्चुगिज सञ्चारमाध्यमका अनुसार, समस्या नर्वेविरुद्धको युइएफए नेसन्स लिग खेलका क्रममा सुरु भएको थियो। केही दिनअघि वेल्सविरुद्ध खेले पछि रोनाल्डोलाई यस खेलमा वैकल्पिक खेलाडीको सूचीमा राखिएको थियो। यद्यपि उनले दोस्रो हाफमा ‘वार्म-अप’ (शरीर तताउने अभ्यास) गरे, तर खेलको परिस्थितिले प्रशिक्षकको योजना परिवर्तन गरिदियो।
अग्रपङ्क्तिमा उत्कृष्ट प्रदर्शन गर्दै गोन्कालो रामोसले २-१ को जितमा निर्णायक गोल गरे। फलस्वरूप, मुख्य प्रशिक्षक जर्ज जेससले रोनाल्डोलाई मैदानमा नउतार्ने निर्णय गरे र उनलाई पूरै ९० मिनेट बेन्चमै राखे। खेल्ने मौका नपाउँदा स्पष्ट रूपमा निराश देखिएका रोनाल्डो खेल सकिएपछि समर्थकहरूलाई धन्यवाद दिन आफ्ना सहकर्मीहरूसँग सामेल हुनुको सट्टा सिधै ‘टनल’ (खेलाडीहरू बाहिरिने बाटो) तर्फ लागे।
आफ्नो छनोटको आधार र टोलीमाथिको अधिकारबारे स्पष्ट पार्दै, जर्ज जेससले खेलाडीको हैसियतसम्बन्धी आफ्नो नीति यसरी बताए, उनले भने “उनको प्रदर्शन नै महत्त्वपूर्ण हुन्छ। विगतको कुनै अर्थ हुँदैन। क्रिस्टियानो पनि अन्य खेलाडीजस्तै हुन्। यदि उनले राम्रो प्रदर्शन गरिरहेका छन् भने खेल्नेछन्। यदि छैनन् भने खेल्ने छैनन्।”
विभिन्न सञ्चारमाध्यमले उल्लेख गरेअनुसार पोर्चुगिज फुटबल महासंघ र जेससले कुनै शारीरिक समस्या नभएको बताए पनि रोनाल्डोले सामान्य सामूहिक प्रशिक्षणको सट्टा जिममा अभ्यास गरे। यस कदमले कप्तान र प्रशिक्षक बीच बढ्दो विवादबारेका समाचारहरूलाई थप मलजल गर्यो। जिम सत्रबारे सञ्चारमाध्यममा चलेका अड्कलबाजीलाई सम्बोधन गर्दै जेससले स्पष्ट पारेका छन । “उनले [प्रशिक्षण गर्न] अस्वीकार गरेका थिएनन्। उनी आज प्रशिक्षण गर्दैछन्। यो चौथो दिन हो, त्यसैले उनी प्रशिक्षण गर्नेछन्। उनले प्रशिक्षण गर्न अस्वीकार गरेका होइनन्। यो असम्भव कुरा हो। के तपाईंलाई त्यस्तो लाग्छ र? क्रिस्टियानोले त्यसो गर्दैनन्।” उनले भने ।
अचानकको बहिर्गमन
मिडियामा विभिन्न अड्कलबाजी र तनाव बढ्दै गएपछि पोर्चुगिज फुटबल महासंघका अध्यक्ष पेड्रो प्रोएन्का रोनाल्डो र जर्ज जेसस दुवैसँग प्रत्यक्ष रूपमा आपतकालीन बैठक गर्न स्कान्डिनेभिया पुगे। वार्ता लगत्तै सञ्चारकर्मीहरूसँग कुरा गर्दै जर्ज जेससले गम्भीर मतभेदको हल्लालाई कम आँक्दै टोली छनोट पूर्ण रूपमा आफ्नो नियन्त्रणमा रहेको कुरामा जोड दिए । “उनीहरूले मलाई एउटा यस्तो विषयमा ‘क्रिस’ (रोनाल्डो) सँग कुरा गर्न बाध्य पारे, जुन वास्तवमा कुनै समस्या नै थिएन। मैले क्रिसलाई भनेँ पोर्चुगलमा यति धेरै चर्चा भइरहेको छ कि हामीले कुरा गर्नुपर्ने भयो, मलाई बुझ्न गाह्रो भइरहेको छ कि आखिर भइरहेको के हो ? त्यहाँ कुरा गर्नुपर्ने कुनै विषय नै थिएन।”
उनले अगाडी भने, “अध्यक्ष आउनुभयो; स्वाभाविक रूपमा, उहाँ टोलीसँगै हुनुपर्छ। पोर्चुगलमा भइरहेका कुराहरूलाई ध्यानमा राख्दै उहाँ के भएको थियो भन्ने बुझ्न चाहनुहुन्थ्यो। तर बेलुकाको खानापछि हामीले त्यो समस्या समाधान गरिसकेका थियौँ, जुन वास्तवमा समस्या नै थिएन।”
यद्यपि, डेनमार्कविरुद्धको आगामी खेलअघि सुरुवाती टोली (स्टार्टिङ लाइन-अप) र रणनीतिक खेलाडी परिवर्तन (सबस्टिच्युसन) को विषयमा जर्ज जेससले आफ्नो अधिकारबारे दृढतापूर्वक दोहोर्याए । “म जे चाहन्छु, त्यही गर्ने वाचा गर्न सक्छु। म प्रशिक्षक हुँ। मैले ती खेलाडीलाई भनेँ कि उनी खेल्ने छैनन्। ‘म तिमीलाई बेन्चमा राख्नेछु। यदि मलाई ३० मिनेटका लागि तिम्रो आवश्यकता पर्यो भने तिमी खेल्नेछौ; यदि परेन भने खेल्ने छैनौ।'”
उनले अगाडी भने, “मैले क्रिसलाई भनेँ कि उनी यी दुई खेल खेल्ने छैनन्। खेलको दौरान मलाई लाग्यो कि सायद मलाई उनको आवश्यकता पर्न सक्छ र उनले ‘वार्म-अप’ गरे। त्यसपछि मैले उनलाई मैदानमा उतारिनँ । कुनै पनि खेलाडी, जब २० वा ३० मिनेटसम्म वार्म-अप गर्छन् र त्यसपछि खेलमा मौका पाउँदैनन्, तब कोही पनि खुसी हुँदैनन्। विशेष गरी क्रिस त झन् हुँदै हुँदैनन्। चाहे ती पेले वा म्याराडोना नै किन नहुन्।”
“कुनै पनि खेलाडीले मेरो निर्णय बदल्न सक्दैनन्। न त उनी, न त फुटबल जगतको अरू कोही। न त कुनै अध्यक्ष नै। कहिल्यै होइन, कसैले पनि होइन,” उनले झगडाकाे कारणवारे भने ।
‘मार्का’ को रिपोर्ट अनुसार, उनको यस सार्वजनिक अडानले तनावलाई फेरि बढावा दियो किनकि परिस्थितिलाई जसरी सम्हालियो त्यसमा रोनाल्डोको बुझाइ फरक थियो। त्यसको केही समयपछि नै रोनाल्डोले प्रशिक्षण शिविर छोड्ने घोषणा गरे; उनले आफ्ना सहकर्मीहरूलाई शुभकामना दिए तर राष्ट्रिय टोलीसँगको उनको भविष्यलाई भने गम्भीर अनिश्चिततामा धकेलिदिए।
यस अवस्थाले स्थायी रूपमा सम्बन्ध टुट्ने वा अन्तर्राष्ट्रिय खेल जीवनबाटै संन्यास लिने सम्भावना समेत बढाएको छ, साथै रोनाल्डोले आफ्नो बहिर्गमनको पूर्ण सत्य पछि कुनै समय खुलासा गर्ने रहस्यमय वाचा पनि गरेका छन्।
अन्य समाचारहरु
