आश्विन २६ गते, २०८३ मा प्रकाशित
काठमाडौं, २६ असोज । मोहम्मद सलाहले टर्कीको शीर्ष डिभिजन क्लब फुटबलमा नयाँ कीर्तिमान कायम गरेका छन्।
उनी ‘टर्किश सुपर लिग’ मा ट्राब्जोनस्पोरका लागि आफ्ना पहिलो सात खेलमै १० गोलमा योगदान (गोल र असिस्टसहित) पुर्याउने पहिलो खेलाडी बनेका छन्।
लिभरपुलबाट टर्की आएपछि उत्कृष्ट प्रदर्शन गर्ने क्रममा सामसुनस्पोरविरुद्ध ट्राब्जोनस्पोरको ३-० को जितमा उनले एक ‘असिस्ट’ प्रदान गरे। यससँगै, सात खेलमा सात गोल गरिसकेका उनको नाममा अब कुल तीन ‘असिस्ट’ पनि दर्ता भएका छन्। सुपर लिगमा सुरुवाती सात खेलमा १० गोलमा योगदान पुर्याउने यो कीर्तिमान नै हो।
३४ वर्षीय सलाह अगस्टमा इङ्लिस प्रिमियर लिग क्लब लिभरपुलबाट दुई वर्षको सम्झौतामा टर्कीको टोलीमा सामेल भएका थिए, जुन त्यतिबेला निकै चर्चाको विषय बनेको थियो।
इङ्लिस फुटबलमा गत सिजनको अन्त्यसँगै एन्फिल्ड क्लब छोडेपछि सलाह फ्रि एजेन्ट बनेका थिए। ट्राब्जोनस्पोरमा उनको सरुवा पक्का भएपछि इस्तानबुल विमानस्थलमा उनलाई स्वागत गर्न समर्थकहरूको ठूलो भीड जम्मा भएको थियो।
इजिप्टका कप्तान सलाहले कासिम्पासाविरुद्धको टर्किश सुपर लिगको उद्घाटन खेलमा बेन्चबाट मैदान प्रवेश गर्दै ट्राब्जोनस्पोरका लागि डेब्यु गरेका थिए, जुन खेल १-१ गोलको बराबरीमा सकिएको थियो।
त्यसको एक महिनापछि, उनले ह्याट्रिक गर्नुका साथै एक असिस्ट पनि प्रदान गरे, जसको मद्दतले ट्राब्जोनस्पोरले घरेलु मैदानमा डिफेन्डिङ च्याम्पियन गलातासारेलाई ४-० को फराकिलो गोल अन्तरले पराजित गर्यो। उक्त हार गलातासारेका लागि सिजनको पहिलो हार थियो।
ट्राब्जोनस्पोर टर्कीको सात पटकको च्याम्पियन क्लब हो भने यो टोली गत सिजन तेस्रो स्थानमा रहेकाे थियो।
अन्य समाचारहरु
