कार्तिक १२ गते, २०८३ मा प्रकाशित
काठमाडौं, ११ कात्तिक। इजरायलमा निर्वाचनको दिन मतदानमा सहभागी हुने मतदाताको दर बढेर ७७.७ प्रतिशत पुगेको छ।
केन्द्रीय निर्वाचन समितिले मंगलबार साँझ दिएको जानकारीअनुसार सन् १९९९ यताकै यो सबैभन्दा उच्च मतदान प्रतिशत हो।
करिब ७३ लाख योग्य मतदातामध्ये करिब ५७ लाखले आफ्नो मताधिकार प्रयोग गरेका छन्। स्थानीय समयअनुसार राति १० बजे मतदान केन्द्रहरू बन्द भए पनि समितिले अझै ‘डबल इन्भेलोप’ (दोहोरो खाम) प्रणाली अन्तर्गतका मतपत्रहरू गन्न बाँकी छ, जसमा थप लाखौं मतहरू हुन सक्छन्।
यस्ता ‘डबल इन्भेलोप’ मतपत्रहरू सैनिक, जगेडा सैनिक (रिजर्भिस्ट), कूटनीतिज्ञ र अन्य व्यक्तिहरूले प्रयोग गर्छन्। यसले मतदान प्रतिशतलाई अझ माथि पुर्याउनेछ, तर केन्द्रीय निर्वाचन समिति (सीईसी) ले ती मतपत्रहरूको गणना भने तत्काल सुरु गर्ने छैन।
केन्द्रीय निर्वाचन समितिका अनुसार इजरायलको इतिहासमा सबैभन्दा बढी मतदान प्रतिशत सन् १९८८ मा ७९.७ प्रतिशत रहेको थियो।
यसैगरी, नयाँ ‘एक्जिट पोल’ (मतदानपछिको सर्वेक्षण) अनुसार निर्वाचनको नतिजा निकै प्रतिस्पर्धात्मक देखिएको छ।
नयाँ ‘एक्जिट पोल’ ले बेन्जामिन नेतान्याहू र आइजेनकोटको समूह (ब्लक) बीच बराबरीको अवस्था देखाएको छ।
इजरायलका ‘कान ११’ र ‘च्यानल १३’ समाचार सञ्जालहरूले आफ्ना ‘एक्जिट पोल’ को अद्यावधिक विवरण सार्वजनिक गरेका छन्, जसमा दुवै प्रतिस्पर्धी समूहले ५१-५१ सिट जित्ने अनुमान गरिएको छ।
त्यस्तै, ‘च्यानल १२’ ले पनि आफ्नो ‘एक्जिट पोल’ मा परिमार्जन गरेको छ। यसअनुसार आइजेनकोटको नेतृत्वमा रहेको समूह ५० सिटसहित केही पछाडि छ भने नेतान्याहूको समूह ५२ सिटसहित अगाडि देखिएको छ। यसअघि उनीहरूले नेतान्याहू विरोधी समूहलाई बहालवाला प्रधानमन्त्रीको समूहभन्दा केही अगाडि देखाएका थिए।
बहुमतको सरकार गठन गर्न कुनै पनि समूहलाई इजरायली संसद् (नेसेट) मा कम्तीमा ६१ सिट आवश्यक पर्छ।
इजरायलको केन्द्रीय निर्वाचन समितिबाट आधिकारिक नतिजाहरू आउन थालेका छन्। हालसम्म कुल मतको २.५ प्रतिशत गणना भइसकेको छ।
अन्य समाचारहरु
