जेष्ठ १९ गते, २०६८ मा प्रकाशित
पार्टी मुख्यालय बल्खुमा बुधबार बसेको केन्द्रीय कमिटी बैठकमा ओली पक्षधर केन्द्रीय सदस्यहरुले पाण्डेले छलफलका लागि महासचिवलाई बुझाएको ११ बुँदे प्रस्तावप्रति चर्को आलोचना गरेपछि उनी आत्मालोचना गर्न बाध्य भएका थिए । ‘आशंकाको भरमा प्रस्ताव लेखेको थिएँ,’ पाण्डेको भनाई उद्धृत गर्दै केन्द्रीय सदस्यले भने, ‘म यसमा क्षमायाचना गर्छु ।’ पाण्डेले माधवकुमार नेपाल र ओलीलाई लगाएको आरोपको केही बुँदा हटाउनसमेत तयार भएको ती केन्द्रीय सदस्यले बताए ।
बैठक सुरु हुनेवित्तिकै नेपाल-ओली पक्षधर कर्णबहादुर थापा, भानुभक्त ढकाल, कृष्णगोपाल श्रेष्ठ, खगराज अधिकारी, गुरु बराल, जगन्नाथ खतिवडा, रघुजी पन्तलगायतले पाण्डेको प्रस्तावप्रति आपत्ति जनाएका थिए । पाण्डेको प्रस्ताव पार्टीमाथि गरिएको गम्भीर प्रहार भन्दै उनीहरुले फरक धारका नेताहरुमाथि नेतृत्वले अपराध गरेको आरोप लगाएका थिए ।
ओली पक्षधर नेताहरुले पाण्डे एक्लैले प्रस्ताव तयार नगरेको दाबी गर्दै नेतृत्वकै सहमतिमा उक्त प्रस्ताव ल्याइएको जिकिर गरेका थिए । तर पाण्डेले भने आफूले नै प्रस्ताव लेखेको दाबी गरेको अर्का केन्द्रीय सदस्यले बताए ।
नेपाल-ओली पक्षधरले अध्यक्ष एवं प्रधानमन्त्री झलनाथ खनालविरुद्ध केन्द्रीय कमिटी बैठकमा छलफलका लागि ९ बुँदे प्रस्ताव पेस गरेपछि मंगलबार पोलिटब्युरो सदस्य एवं पूर्व अर्थमन्त्री पाण्डेले नेपाल-ओलीका क्रियाकलापविरुद्ध ११ बुँदे प्रस्ताव पेस गरेका थिए ।
पाण्डेको प्रस्तावमा पार्टीभित्र गुण्डा संस्कृतिलाई बढवा दिएको, अपराधीलाई संरक्षण दिएको, ठेक्कापट्टा कब्जा गरेको, भन्सार नाकाबाट तस्करी गराउने गरेको, अपहरणकारीलगायतका अपराधीहरुसँग मिलेर आर्थिक भागबण्डा गरेको र अदृश्य ढंगले स्रोत संकलन गरी पार्टी हितबिरुद्ध दुरुपयोग गरेर पार्टीको प्रतिष्ठालाई आघात पुर्याउने काम गरेका भन्दै त्यसको अविलम्ब छानबिनको माग गरिएको छ ।
मदन भण्डारी फाउन्डेशन, मदन भण्डारी स्पोर्टस् एकेडेमी, अरु विभिन्न नाममा समानान्तर गतिविधि गरेको, गुटगत भेलाहरु गरेको, अदृश्य स्थानबाट आर्थिकस्रोत प्राप्त गरी पार्टीबिरुद्ध गुटबन्दीको लागि प्रयोग गरेकोको पनि पाण्डेको प्रस्तावमा छ ।
माओवादीको विरोध गर्ने नाममा पार्टीलाई कांग्रेसको पछिलल्गु बनाउने प्रयत्न गरेको र महाधिवेशनको फैसलाअनुसार पार्टीको सही क्रान्तिकारी कार्यदिशालाई कुल्चिदै पार्टीलाई दक्षिणपन्थी भासमा पुर्याएको आरोप छ ।
पार्टी निर्णय, पद्धति र अनुशासन उल्लंघन गर्दै सडक र मिडियाबाट पार्टी अध्यक्ष र पार्टी नेतृत्वबिरुद्ध विषबमन गर्दै हिंडेको । पार्टीको स्थापित पद्धति, परम्परा र विधानबिरुद्ध अध्यक्ष र प्रधानमन्त्रीको राजीनामा मागेकाले अनुशासनको कारबाही गर्नुपर्ने माग पनि छ । पार्टी कार्यक्रममा गुटगत गतिविधि गर्न विभिन्न जिल्लामा हेलिकप्टरबाट भ्रमण गरेको र विभिन्न विद्यालय, संघसंस्था, व्यक्ति आदिलाई आर्थिक सहयोग गराउँदै आएको । त्यस्तो खर्चको स्रोत पार्टीलाई कहिल्यै नदिएको ले तत्काल छानबिन गर्नुपर्ने माग पनि गरिएको छ ।
जनआन्दोलनका बिरुद्ध उभिएको, गणतन्त्रबिरुद्ध राजतन्त्रको पक्षमा वकालत गरेको, गणतन्त्र स्थापना गर्नुलाई ठेलागाडामा चढेर अमेरिका जानुजस्तै हो भनेर उपहास गरेको आरोप पनि पाण्डेको प्रस्तावमा छ । उनले आफूले पेश गरेका प्रस्तावमा छलफल गरी त्यस्ता गतिविधिमा संलग्नहरुलाई कारवाही गर्नुपर्ने माग गरेका थिए ।
अन्य समाचारहरु
