अर्घाखाँची – भूमिकास्थानमा बजार अनुगमनको सकरात्मक प्रभावः उपभोक्ताले वस्तुको लेवल हेर्न थाले (तस्बिर सहित)

-गोपाल प्रसाद भट्टराई

मंसिर–२३,अर्घाखाँची , अर्घाखाँची – स्थानिय सरकारले बजार अनुगमन गर्न थालेपछि ग्रामीण भेगमा पनि उपभोग्य बस्तुको लेवल हेर्ने बानीको विकास भएको छ । अर्घाखाँचीको भुमिकास्थान नगरपालिकाले १० वटै वडामा नियमित रुपमा बजार अनुगमन गर्न थालेपछि नगरवासीहरुपनि उपभोग्य वस्तुको गुणस्तर हेरेर मात्रै उपयोग गर्न थालेका हुन् । “सुरु–सुरुमा त हामी अनुगमनमा जाँदा पसलेहरु ढोका लाएर हिड्ने गर्नुहुन्थ्यो, अहिले व्यवसायि र उपभोक्ता दुवै सचेत हुंदै जानुभएको छ ।” नगरस्तरिय बजार अनुगमन टोलिका निरिक्षण अधिकृत शंकर अधिकारीले भन्नुभयो ।

नगरपालिकाबाट नियमित अनुगमन, सूचना सम्प्रेषण र सचेतनामुलक अभियान संचालन गर्न थालेपछि अहिले आफ्नो व्यवसाय दर्ता गर्ने, सामानको लेभलिङ्ग जाँच गर्ने र राज्यलाई कर तिर्ने कुरामा समेत व्यवसायिहरु अग्रसर बन्न थाल्नुभएको भूमिकास्थान नगरपालिकाका नगर प्रमुख झविलाल थापाको पनि भनाई छ ।

व्यबसायिले मात्रै नभएर अहिले उपभोक्ताले समेत दैनिक उपभोग्य बस्तुमा हुनुपर्ने लेभलको जाँच गरेर प्रयोग गर्नेहरुको संख्या बढ्न थालेको नगर प्रमुख थापाले बताउनुभयो । उपभोग्य वस्तुमा उत्पादन मिति, एक्सपायर मिति र बिक्री मुल्य जस्ता लेभल हेरेर खरिद बिक्रि गर्ने, कानुनी मापदण्ड अनुसार व्यवसाय दर्ता गर्ने र राज्यलाई कर तिर्ने बानीको विकास भएको देख्दा आफुलाई निकै खुशी लागेको भूमिकास्थान नगर उप–प्रमुख बालकृष्ण बन्जाडेको भनाई छ ।

चालु आर्थिक बर्ष २०८२÷०८३ को पाचौं महिनामा विभिन्न वडामा ३ पटक बजार अनुगमन गरिएको र जसबाट अघिल्ला बर्षहरुमा भन्दा व्यवसायी र उपभोक्तामा सचेतना बढेको पाइएको प्रमुख प्रशासकिय अधिकृत जग्दीश चन्द्र नेपालीको भनाई छ ।

ब्यापार, व्यवसायमा गुणस्तरिय सेवा र वैद्यता प्रदान गर्नाले पालिकाको आन्तरिक आयमा वृद्धि हुने र नागरिकको स्वास्थ्यमा समेत सुधार आउने प्रमुख प्रशासकिय अधिकृत नेपालीको विस्वास छ ।

भूमिकास्थानले सोमबार वडा नम्बर ४, धारापानीको मूख्य क्षेत्र धाराबजार र आसपासमा रहेका सबैखाले पसलहरुको अनुगमन गरेको छ । अनुगमन टोलीका निरिक्षण अधिकृत अधिकारीको नेतृत्वमा, पशुविकास अधिकृत बलराम खनाल, रोजगार संयोजक पुस्कर मिश्र, धारापानी स्वास्थ्यचौकीका अहेब तारापती भट्टराई, उद्यम विकास सहजकर्ता बन्दना रावत र धारापानी प्रहरी चौकीको प्रहरी टोलीले ति स्थानका २० वटा बढि पसलमा अनुगमन गरेको हो ।

अनुगमन गर्दा म्याद गुज्रिएका तथा लेभलिङ्ग नगरिएका सामान नभेटिएको तर केही ब्यवसायीहरुले भने पसल दर्ता नगरेको, नविकरण नगरेको, शाइनबोर्ड तथा मुल्यसुची नराखेको पाइएको टोलीका संयोजक शंकर अधिकारीको भनाइ छ ।

त्यस्ता व्यवसायीलाइ ७ देखि ३५ दिनभित्रमा नगरपालिकामा गएर पसल दर्ता र नविकरण गर्न निर्देशन गरेको टोलीले बताएको छ । नेपालको परिवेशमा बजार अनुगमन चाडपर्व लक्षित र कर्मकाण्डी हुन्छन् भन्ने गलत भास्यलाई चिर्दै भूमिकास्थानले बजार अनुगमनलाई नियमित गर्दै आएको अनुगमन निरिक्षण अधिकृत शंकर अधिकारीको दाबी छ ।