१ करोड ८४ लाख दर्शकले हेरे बिटिएसको पुनरागमन कन्सर्ट

काठमाडौँ । दक्षिण कोरियाली चर्चित सङ्गीत समूह बिटिएसको पुनरागमन कन्सर्टले विश्वभर ठूलो चर्चा पाएको छ । नेटफ्लिक्समार्फत प्रत्यक्ष प्रसारण गरिएको उक्त कन्सर्ट १ करोड ८४ लाख दर्शकले हेरेका छन् ।

शनिबार भएको एक घण्टाको कार्यक्रममा समूहका सबै सात सदस्यहरु जिन, सुगा, जे-होप, आरएम, जिमिन, भी र जङकुक एकैपटक मञ्चमा देखिएका थिए । सन् २०२२ अक्टोबरपछि पहिलोपटक उनीहरू सँगै प्रस्तुत भएका हुन् ।

कन्सर्ट दक्षिण कोरियाको सोलस्थित ग्वाङ्ह्वामुन स्क्वायरमा आयोजना गरिएको थियो, जहाँ करिब १ लाख ४ हजार दर्शक सहभागी भएका थिए । यद्यपि सुरक्षाका कारण मुख्य स्थलभित्र झण्डै २२ हजार दर्शकलाई मात्र प्रवेश दिइएको थियो । अन्यले वरपर राखिएका ठूला पर्दामार्फत कार्यक्रम हेरेका थिए ।

यो कार्यक्रम विश्वका १९० भन्दा बढी देशमा एकैसाथ प्रसारण गरिएको थियो । कन्सर्टपछि नेटफ्लिक्सको लोकप्रिय सूचीमा २४ देशमा शीर्ष स्थानमा पुगेको जनाइएको छ ।

कार्यक्रम व्यवस्थापनका लागि करिब ७ हजार प्रहरी परिचालन गरिएको थियो । भीड नियन्त्रणका लागि विशेष सुरक्षा प्रवन्ध गरिएको थियो ।

कन्सर्टसँगै समूहले विश्व भ्रमण पनि सुरु गरेको छ, जसमा ८२ वटा कार्यक्रम तय गरिएको छ । साथै ‘अरिराङ’ नामक नयाँ एल्बम पनि सार्वजनिक गर्ने तयारी छ ।

कन्सर्टपछि हाइबको सेयरमा भने गिरावट आएको छ । सोमबार कम्पनीको सेयर मूल्य करिब १५.५ प्रतिशतले घटेको छ । विश्लेषकका अनुसार पुनरागमनपछि कन्सर्ट, एल्बम बिक्री, सामग्री व्यापार र प्रसारणबाट समूहले १ अर्ब डलरभन्दा बढी आम्दानी गर्ने अपेक्षा गरिएको छ । बिटिएस हाइबको एक सिस्टर कम्पनिको रुपमा काम गर्दछ र हाइबको मुख्य आम्दानीको स्रोत बिटिएसलाई मानिन्छ र उनीहरूको विश्राम अवधिमा कम्पनीको नाफा घटेको थियो ।