चितवन जिल्लालाई चार टुक्रा पार्ने गरी राज्य पुर्नसंरचना आयोगले तयार पारेको प्रतिवेदनको विरुद्ध चितवनमा गठित संर्घष समितिले राजधानीलाई नाकाबन्दी गर्ने कार्यक्रम घोषणा गरेको छ ।
चितवनमा आज सम्पन्न वृहत भेलाले आयोगको बहुमत पक्षले संघियताको नाममा जिल्लालाई चार टुक्रा पार्ने प्रतिबेदन दिएको ठहर गर्दै त्यसको सशक्त प्रतिबाद गर्ने निर्णय गरेको हो ।
जातीय राज्य बनाउने मनसायले तयार पारिएको आयोगको प्रतिवेदन असान्दर्भिक भएको ठहर गर्दै माओवादी, कांग्रेस, एमालेलगायतका मुख्य दल र विभिन्न संघ सस्थाहरुको प्रतिनिधत्व हुने गरी संघर्ष समिति घोषणा गरिएको छ ।
६ वटा राजनीतिक दलको आव्हानमा बृहत्तर एकीकृत चितवन निर्माण गर्न पांच सय एक सदस्यीय संयुक्त संघर्ष समितिले पहल गर्ने भएको छ ।
भेलाका केही सहभागीले चितवनलाई देशको राजधानी बनाउन पहल थाल्नुपर्नेमा समेत जोड दिएका थिए । एकीकृत चितवनको माग गर्दै समितिले फागुन ११ गते आमसभा गर्ने, १२ र १३ गते राजधानीलाई नाकाबन्दी गर्ने र १५ गते चितवन बन्द गर्ने कार्यक्रम सार्वजनिक गरेको छ ।
माघ २९ गते, २०६८ मा प्रकाशित
