राष्ट्रपति डा. रामवरण यादवले अब संविधान सभाको म्याद थप्न नसकिने भन्दै बांकी रहेको अवधिभित्रै शान्ति र संविधान लेखनलाई टुंगोमा पु-याउनु पर्नेमा जोड दिनुभएको छ ।
शान्ति प्रक्रिया र संविधान निमार्णलाई संविधान सभाको बाँकी अवधिभित्रै टुंगोमा पु-याउने ढंगबाट दलहरुबीच छलफल नचलेको भन्दै राष्ट्रपतिले जनताले आभास गर्ने गरी तत्काल निर्णय लिन समेत दलहरुलाई आग्रह गर्नुभएको छ ।
राष्ट्रपति भवनमा आज प्रमुख प्रतिपक्षी नेपाली कांग्रेस संसदीय दलका नेता रामचन्द्र पौडेलसंगको भेटमा राष्ट्रपति यादवले संविधान सभाको बाँकी अवधिभित्रै दुवै प्रक्रिया टुंगिने गरी कामको गति बढाउन आग्रह गर्नुभएको हो ।
राष्ट्रपति यादवले लडाकु समायोजनमा पनि नेपाली सेनालाई विवादमा नतान्न सचेत गराउँदै राजनीतिक तहमा सहमति गरेर सेनालाई सहभागी गराउनुपर्ने धारणा राख्नु भएको थियो ।
भेटमा नेता पौडेलले भने दलहरुबीच पछिल्ला दिनमा भएको छलफल सकारात्मक भएको भन्दै भोली हुने तीन दलको बैठकबाट केही निकास आउने आशा गरिएको बताउनुभयो । उहांले माओवादीमा इमान्दारीता र इच्छाशक्ति भए शान्ति र संविधान निर्माण टुंगोमा पु-याउन खाशै समस्या नभएको पनि बताउनुभयो ।
राष्ट्रपति यादव र कांग्रेस नेता पौडेलबीच झण्डै सवा घण्टा वार्ता भएको थियो ।
फाल्गुन १९ गते, २०६८ मा प्रकाशित
