जेष्ठ १९ गते, २०८३ मा प्रकाशित
प्रजातान्त्रिक गणतन्त्र कङ्गो (डीआरसी) को उत्तरपूर्वी इतुरी प्रान्तको राजधानी बुनियामा इबोला भाइरसबाट सङ्क्रमित पाँच जना बिरामीहरू उपचारपछि निको भएका छन् । स्वास्थ्य अधिकारीहरूले दिएको जानकारीअनुसार निको हुनेहरूमा चार जना स्वास्थ्यकर्मी र एक जना प्रयोगशाला कर्मचारी रहेका छन् ।
कङ्गोको राष्ट्रिय जनस्वास्थ्य संस्थानका महानिर्देशक डियुडोने म्वाम्बा काजादीले बुनियास्थित इबोला उपचार केन्द्रबाट चार जना नर्स तथा स्वास्थ्यकर्मीलाई डिस्चार्ज गरिएको पुष्टि गर्नुभयो ।
उनीहरूको स्वास्थ्य परीक्षणमा लगातार दुई पटक नतिजा नकारात्मक (नेगेटिभ) आएपछि घर पठाइएको हो । यसअघि नै एक प्रयोगशाला कर्मचारी निको भएर घर फर्किसकेका थिए ।
विश्व स्वास्थ्य सङ्गठन (डब्ल्यूएचओ) का महानिर्देशक टेड्रोस अधानोम गेब्रेयसस पनि नयाँ इबोला उपचार केन्द्रको उद्घाटनका लागि बुनिया पुग्नुभएको थियो । सो क्रममा उहाँले बाँच्न सफल भएकाहरूको साहसको प्रशंसा गर्दै यसले महामारी नियन्त्रणमा नयाँ आशा जगाएको बताउनु भयो । उहाँले ज्यानको जोखिम मोलेर सेवामा खटिएका स्वास्थ्यकर्मीहरूको समर्पणप्रति आभार समेत व्यक्त गर्नुभयो ।
कङ्गोको स्वास्थ्य मन्त्रालयले सार्वजनिक गरेको पछिल्लो तथ्याङ्क अनुसार मे २९ सम्ममा देशभर इबोलाका २६३ जना सङ्क्रमित पुष्टि भएका छन् । जसमध्ये ४२ जनाको मृत्यु भइसकेको छ । स्वास्थ्य मन्त्री रोजर काम्बाले हाल निगरानी, कन्ट्याक्ट ट्रेसिङ र प्रयोगशाला परीक्षणलाई निकै तिब्रता दिइएको जानकारी दिनुभयो । यद्यपि अफ्रिका सेन्टर फर डिजिज कन्ट्रोल एन्ड प्रिभेन्सन (अफ्रिका सीडीसी) का महानिर्देशक जीन कासेयाले मे ३० सम्मको तथ्याङ्कअनुसार अझै १ हजार १ सय भन्दा बढी नमूनाहरूको परीक्षण परिणाम आउन बाँकी रहेको बताउनुभएको छ ।
अन्य समाचारहरु
