जेष्ठ २६ गते, २०८३ मा प्रकाशित
दक्षिण अफ्रिकामा बढ्दो आप्रवासी विरोधी भावना र असुरक्षाका कारण घाना सरकारले आफ्ना नागरिकको दोस्रो समूहलाई स्वदेश फर्काएको छ । ३४० जना घानाली नागरिकहरूलाई विशेष उद्धार गरी स्वदेश ल्याइएको हो । अक्रा अन्तर्राष्ट्रिय विमानस्थलमा स्वदेश फर्किएका नागरिकहरूलाई स्वागत गर्दै घानाका विदेश मन्त्री स्यामुएल ओकुदजेटो अब्लाक्वाले उनीहरूको पुनःस्थापनाका लागि सरकारले पूर्ण सहयोग गर्ने प्रतिवद्धता व्यक्त गर्नुभयो ।
मन्त्री अब्लाक्वाले आप्रवासीहरूलाई दक्षिण अफ्रिकामा देखाएको जस्तै कार्यदक्षता र उत्साहका साथ स्वदेशमै नयाँ उद्यममा लाग्न र सकारात्मक सोच राख्न आग्रह गर्नुभयो । विदेश मन्त्रीकाअनुसार स्वदेश फर्किएका नागरिकहरूलाई रोजगारी प्रदान गर्न हालसम्म विभिन्न स्वदेशी कम्पनीहरूबाट २०० वटा रोजगारीका प्रश्तावहरू प्राप्त भइसकेका छन् ।
यसैबीच, घाना सरकारले दक्षिण अफ्रिकामा आफ्ना नागरिकहरूले गुमाएको सम्पत्ति र लगानीको क्षतिपूर्तिका लागि कानूनी प्रक्रिया शुरु गर्ने घोषणा गरेको छ । दक्षिण अफ्रिकामा विदेशी नागरिकहरू लक्षित हिंसा र विभेद बढेसँगै विभिन्न देशहरूले आफ्ना नागरिकलाई सुरक्षित रूपमा स्वदेश फर्काइरहेका छन् । यसअघि पनि घानाले पहिलो चरणमा आफ्ना केही नागरिकको उद्धार गरिसकेको छ ।
अन्य समाचारहरु
