नेतान्याहूले फेरि प्रधानमन्त्री पदको लागि चुनाव लड्ने

तेल अहिव, २८ जेठ । इजरायली प्रधानमन्त्री बेन्जामिन नेतान्याहूले अर्को चुनावमा भाग लिने आफ्नो इरादा घोषणा गरेका छन्। उनको लिकुड पार्टीले बुधबार यो घोषणा गरेको छ। लिकुड पार्टीले एक विज्ञप्ति जारी गर्दै नेतान्याहू फेरि चुनाव लड्ने र भगवानको कृपाले जित्ने बताएको छ। पहिले, नेतान्याहूले चुनाव नलड्ने अनुमान गरिएको थियो। इजरायलमा चुनावको मिति अझै घोषणा गरिएको छैन, तर हालको नियम अनुसार अक्टोबरसम्ममा चुनाव हुनुपर्छ।

अक्टोबर ७, २०२३ मा हमासको आक्रमणपछि यो इजरायलको पहिलो राष्ट्रिय चुनाव हुनेछ। यो आक्रमणलाई इजरायलको सबैभन्दा ठूलो सुरक्षा असफलता मध्ये एक मानिन्छ।

डिसेम्बर २०२२ मा सत्तामा फर्कने नेतान्याहू हाल इजरायलको इतिहासमा सबैभन्दा दक्षिणपन्थी गठबन्धनको नेतृत्व गर्छन्। उनको कार्यकाल निरन्तर राजनीतिक विवाद र क्षेत्रीय द्वन्द्वले भरिएको छ। गाजा, लेबनान र इरानमा द्वन्द्व हुनुभन्दा पहिले उनको सरकार विरुद्ध ठूला राष्ट्रव्यापी विरोध प्रदर्शनहरू भएका थिए। सुरक्षा र घरेलु मुद्दाहरूमा उनी अझै पनि आलोचनाको सामना गरिरहेका छन्।

हालैका जनमत सर्वेक्षणहरूले नेतान्याहूको गठबन्धनले अर्को चुनावमा संसदीय बहुमत प्राप्त गर्न संघर्ष गर्न सक्ने संकेत गरेका छन्। जुन ९ मा जारी गरिएको एक सर्वेक्षणमा, ६१ प्रतिशत इजरायलीहरूले नेतान्याहूले पुनस् चुनावमा उम्मेदवारी दिनु हुँदैन भनेका छन्।