चैत्र १९ गते, २०६८ मा प्रकाशित
शनिबारदेखि राजविराजमा सुरु भएको राष्ट्रिय मैथिली सम्मेलनको उद्घाटन गर्दै प्रधानमन्त्री चैतको अन्तिम सातामा शान्तिप्रक्रियाको अन्तिमरुप दिनेमा आफू आशावादी रहेको बताउँदै १४ जेठ अगावै संविधान जारी गर्नतर्फ आफूहरू लागेको जिकिर गरे ।
‘६ हजार ५ सय लडाकु नेपाली सेनामा समयोजन हुनेछ’, प्रधानमन्त्री भट्टराईले भने, ‘बाँकीलाई अरुतिर लगाउनेबारे दलहरुभित्र छलफल भइरहेको छ ।’
वर्तमान सरकारको मूल लक्ष्य शान्ति र संविधान रहेको चर्चा गर्दै प्रधानमन्त्री भट्टराईले जुनसुकै हालतमा यो दुवैलाई पूरा गरेर छाड्ने दाबी गरे ।
‘संघीयताको सवालमा सरकार गम्भीर छ’, उनले भने, ‘संघीयता बिनाको संविधान जारी हुन लागेको भनी बाहिर चलेका हल्ला निराधार छन्, संघीयतासहितको पूर्ण संविधान जारी गर्न सरकार कटिबद्ध छ ।’ नयाँ संविधानमा मधेसी आदिवासी, जनजातिलाई सहभागिता गराउने उनले विश्वास व्यक्त गरे ।
‘मिथिला र मधेसको स्वायत्तता प्रति सरकार सजग छ’, मैथिली भाषामा अभिब्यक्ति दिएका प्रधानमन्त्री भट्टराईले अगाडि भने, ‘जनयुद्ध, जनआन्दोलन र मधेस आन्दोलनको मूल भावनालाई नयाँ संविधानमा उल्लेख हुनेछ ।’
सम्मलेन उद्घाटनको समाप्तिमा प्रधानमन्त्री भट्टराईले स्थानीय पब्लिक विन्देश्वरी माविका पूर्व प्रधानाध्यापक रामचन्द्र झाको शालिकलाई अनवारण गरेका थिए ।
करिब २० मिनेटसम्म आफ्ना अभिव्यक्ति दिएका प्रधानमन्त्री भट्टराईले मैथिली भाषामा लिखित अभिब्यक्ति दिएका थिए ।
यसअघि स्थानीय केअ माविबाट सयौंको संख्यामा मैथिली समुदायहरुको झाँकी नगरको विभिन्न भागमा परिक्रमा गरेको थियो ।
दुई दिनसम्म चल्ने राष्ट्रिय मैथिली सम्मेलनमा पूर्व मेचिदेखि पश्चिम महाकालीसम्मका तीन सय भन्दा बढी मैथिली बुद्धिजिवी, साहित्यकार, शिक्षक सहितको सहभागिता रहेको सम्मेलन आयोजक समितिका संयोजक विष्णुकुमार मण्डलले जानकारी दिए ।
अन्य समाचारहरु
