चीनको चर्को विरोधका बाबजुद एशिया प्रशान्त क्षेत्रमा आफ्नो सैन्य उपस्थिति बलियो बनाउदै अमेरिकी नौ सेनाको एक टोली अष्ट्रेलियाको डर्विन पुगेको छ ।
यो टोलीमा २ सय सदस्य छन् ।
अमेरिकी राष्ट्रपति बाराक ओबामाले यस क्षेत्रमा अमेरिकी सैन्य क्षमता मजबुद बनाउने घोषणा गरेपछि अमेरिकी नौसेनाको पहिलो टोली अष्ट्रेलिया पुगेको हो ।
अमेरिकाले सन् २०१७ सम्म यस क्षेत्रमा आफ्ना २५ सय नौ सेना पठाउने योजना सार्वजनिक गरेको छ । डर्बिनमा अमेरिकी नौसेनालाई अष्ट्रेलियाली प्रधानमन्त्री जुलिया गिलार्ड लगायतका उच्च अधिकारीहरुले स्वागत गरेका थिए ।
अमेरिकी नौ सेनालाई स्वागत गर्दै अष्ट्रेलियाका रक्षामन्त्री स्टीफन स्मिथले अमेरिकी नौसेनाको उपस्थिति चीन र भारतको सामरिक र राजनीतिक उदय विरुद्ध पहिलो कदम भएको बताउनु भयो । अष्ट्रेलियाले गत हप्ता मात्र अमेरिकी मानव रहित विमान आफ्नो भूमिमा तैनाथ गर्न अनुमति दिन सक्ने जनाएको थियो ।
चैत्र २२ गते, २०६८ मा प्रकाशित
