आषाढ़ २६ गते, २०८३ मा प्रकाशित
काठमाडौं। मुगुका गणेश नेपालीको उपचारका क्रममा बिहीबार निधन भएको छ। बुधबार काठमाडौंको त्रिपुरेश्वरस्थित राहदानी विभाग अगाडि आफ्नै शरीरमा पेट्रोल छर्केर आगो लगाएका उहाँको वीर अस्पतालमा उपचारका क्रममा बिहान करिब ११:२० बजे मृत्यु भएको हो।
घटनापछि गम्भीर घाइते भएका नेपालीलाई तत्काल वीर अस्पताल पुर्याई भेन्टिलेटरमा राखेर उपचार गरिएको थियो। चिकित्सकले प्रारम्भिक शल्यक्रिया गरे पनि उहाँको स्वास्थ्य अवस्थामा अपेक्षित सुधार आउन सकेन। थप उपचारका लागि भारत लैजाने तयारी गरिएको भए पनि स्वास्थ्य अवस्था अत्यन्त जटिल बनेपछि चिकित्सकले त्यसलाई स्थगित गरेका थिए।
अन्ततः उपचारकै क्रममा उहाँको निधन भएको हो।
गणेश नेपालीले यस्तो कठोर निर्णय किन लिनुपर्यो भन्ने विषयले अहिले देशभर चासो र बहस सिर्जना गरेको छ। घटनाले नागरिकले सार्वजनिक सेवा प्राप्त गर्ने क्रममा भोग्ने समस्या, गुनासोको सुनुवाइ, सेवाप्रवाहको प्रभावकारिता तथा राज्य संयन्त्रको जवाफदेहितामाथि गम्भीर प्रश्न उठाएको छ।
सामाजिक सञ्जालदेखि सार्वजनिक वृत्तसम्म धेरैले यो घटनाको निष्पक्ष छानबिन गर्न, वास्तविक कारण सार्वजनिक गर्न तथा यस्ता पीडादायी घटना दोहोरिन नदिन सम्बन्धित निकायले प्रभावकारी कदम चाल्नुपर्ने माग गरेका छन्।
यस घटनासम्बन्धी आवश्यक अनुसन्धान सम्बन्धित निकायले अघि बढाइरहेको जनाएको छ।
अन्य समाचारहरु
