श्रावण १३ गते, २०८३ मा प्रकाशित
काठमाडौं, १३ साउन । विश्वकै कुख्यात यौन अपराधीहरूमध्ये एक जेफ्री एपस्टाइनको मृत्यु भएको सात वर्ष बितिसक्दा पनि उनको अर्बौं डलरको सम्पत्तिलाई लिएर विवाद कायमै छ।
अमेरिकी अनुसन्धान निकायहरूबाट प्राप्त नयाँ कागजातहरूले बेलारुसकी ३७ वर्षीया दन्त चिकित्सक करिना शुलियाक उनको सम्पत्तिको मुख्य दाबेदार हुन सक्ने देखाएका छन्।
कागजातहरूका अनुसार, एपस्टाइनले आफ्नो नाममा करिब १४७० करोड नेपाली रुपैयाँ बराबरको सम्पत्ति र ३३ क्यारेटको हिराको औंठी करिनाका नाममा छोडेका थिए। न्युयोर्क टाइम्सका अनुसार करिना शुलियाक एपस्टाइनकी प्रेमिका थिइन्। १० अगस्ट २०१९ मा न्युयोर्कको जेलमा आत्महत्या गर्नु अघि एपस्टाइनले अन्तिम पटक फोन गरेको व्यक्ति पनि उनी नै थिइन्।
सन् २०१९ मा जेफ्री एपस्टाइनको मृत्युपछि डा. करिना शुलियाक सार्वजनिक चर्चाबाट टाढा रही सामान्य जीवन बिताइरहेकी थिइन्। तर, यो अवस्था लामो समयसम्म कायम भने रहन सकेन् । जनवरीको अन्त्यतिर अमेरिकी न्याय विभागले एपस्टाइनसँग सम्बन्धित करिब ३० लाख पृष्ठका कागजात, इमेल र अभिलेखहरू सार्वजनिक गर्यो। यसमा डा. करिना शुलियाक र एपस्टाइनबीच आदानप्रदान गरिएका हजारौं निजी इमेलका साथै उनीहरू सँगै देखिएका थुप्रै तस्बिरहरू पनि समावेश थिए।
यी कागजातहरूले उनीहरू दुईबीच करिब ८ वर्षसम्म कायम रहेको सम्बन्धको खुलासा गरिदिएको थियो। अभिलेखहरूका अनुसार बेलारुसमा जन्मिएकी करिना शुलियाकले आफूलाई कहिल्यै पनि एपस्टाइनको पीडितका रूपमा चिनाइनन् र एफबीआईले पनि एपस्टाइन प्रकरणका सम्बन्धमा उनीसँग कहिल्यै सोधपुछ गरेन। एपस्टाइनबाट पीडित भएको दाबी गर्ने सयौं व्यक्तिको प्रतिनिधित्व गर्ने वकिलहरूले पनि उनीसँग कहिल्यै बयान लिएनन्।
अनुसन्धानका अभिलेखहरूका अनुसार करिना शुलियाकले सन् २०११ को मार्चको अन्त्यतिर जेफ्री एपस्टाइनलाई भेटेकी थिइन्। त्यसबेला उनी २१ वर्षकी थिइन् र न्युयोर्कमा आएको जम्मा ९ महिना मात्र भएको थियो। उनी आफ्नो दन्त चिकित्सा सम्बन्धी अध्ययन पूरा गर्न विद्यार्थी भिसामा बेलारुसबाट अमेरिका आएकी थिइन्।
त्यतिबेलासम्म एपस्टाइनले फ्लोरिडामा वेश्यावृत्तिका लागि एक नाबालिग बालिकालाई उपलब्ध गराएको अभियोगमा आफ्नो दोष स्वीकार गरिसकेका थिए। उनीमाथि दर्जनौं नाबालिग केटीहरूको यौन शोषण गरेको आरोप पनि लागेको थियो। न्युयोर्क टाइम्सका अनुसार ती दुईको चिनजान एक महिलाले गराएकी थिइन्। ती महिलाले बताइन् कि उनलाई समय समयमा अन्य युवतीहरूलाई पनि एपस्टाइनकहाँ ल्याउन भनिन्थ्यो।
अनुसन्धानका अभिलेखहरूका अनुसार जेफ्री एपस्टाइनले डा. करिना शुलियाकलाई आफ्नो प्रिय व्यक्तिको रूपमा वर्णन गर्थे र प्रायः आफूले उनलाई माया गर्ने बताउँ थे पनि । उनले शुलियाकलाई आफ्ना क्रेडिट कार्डहरू प्रयोग गरेर आफूले चाहेको जुनसुकै सामान खरिद गर्ने पूर्ण स्वतन्त्रता दिएका थिए। उनीहरूले सँगै विभिन्न देशहरूको भ्रमण पनि गरेका थिए।
अभिलेखहरूका अनुसार, एपस्टाइनले करिनालाई केही वर्षको अवधिमा करिब १० लाख डलर दिएका थिए। उनले बेलारुसमा बस्ने उनका आमाबुवालाई पनि हजारौं डलर पठाएका थिए। इमेलहरूबाट यो पनि खुल्छ कि सन् २०१२ मा एपस्टाइनले करिनालाई कोलम्बिया विश्वविद्यालयको डेन्टल स्कुलमा भर्ना पाउन मद्दत गरेका थिए। उनले करिनाको तीन वर्षे कोर्षको सम्पूर्ण शिक्षण शुल्क व्यहोर्ने निर्णय पनि गरेका थिए। समयसँगै, करिनाले एपस्टाइनको यति धेरै विश्वास जितिन् कि उनले एपस्टाइनका सम्पत्ति र कर्मचारीहरूको व्यवस्थापनमा सघाउन थालेकी थिइन्।
सन् २०१२ मा डा. करिना शुलियाकले कोलम्बिया विश्वविद्यालयमा भर्नाका लागि आवेदन दिइन्। त्यसबेलासम्म उनको विद्यार्थी भिसाको म्याद सकिइसकेको थियो र उनी संयुक्त राज्य अमेरिकामा बस्न पाउने अनुमतिभन्दा बढी समयदेखि त्यहाँ बसिरहेकी थिइन्।
अमेरिकी न्याय विभागका कागजातहरूका अनुसार जेफ्री एपस्टाइनले उनलाई अमेरिकामा बस्न सघाउने उद्देश्यले सन् २०१३ को सुरुतिर एउटा योजना बनाए। त्यस समयमा न्युयोर्कमा समलिङ्गी विवाहलाई कानुनी मान्यता प्राप्त थियो। एपस्टाइनको बुझाइमा कुनै अमेरिकी महिलासँग विवाह गर्दा करिनाका लागि ग्रीन कार्ड र अन्ततः नागरिकता प्राप्त गर्न सहज हुने थियो।
यस योजनाअन्तर्गत, उनले करिनाको विवाह आफ्नै एक महिला कर्मचारीसँग गराउने प्रबन्ध मिलाए। इपस्टाइनले एउटा इमेलमा उल्लेख गरेअनुसार ‘ग्रिन कार्ड’ प्राप्त गर्ने सबैभन्दा छिटो उपाय समलिङ्गी विवाह नै थियो। पछि, अमेरिकी कंग्रेसका डेमोक्र्याटिक सांसदहरूले इपस्टाइनले अमेरिकी आप्रवासन प्रणालीको दुरुपयोग गरेको आरोप पनि लगाए। उनीहरूको दाबी थियो कि उक्त विवाह केवल कागजी रूपमा मात्र सीमित थियो। डा। करिना शुलियाक सन् २०१८ को मे महिनामा अमेरिकी नागरिक बनिन् र त्यसको करिब एक वर्षपछि सम्बन्धविच्छेद गरिन्।
अन्य समाचारहरु
