रवि लामिछानेलाई मधेशवादी दलहरुले भने– ‘मधेशमा उत्पन्न परिस्थितिबारे सरकार निकै संवेदनहीन र गैरजिम्मेवार भयो’

काठमाडौं । सत्तारुढ दल राष्ट्रिय स्वतन्त्र पार्टी (रास्वपा)का सभापति रवि लामिछानेले सुनसरी, सिरहालगायत पूर्वी मधेशका जिल्लामा बढ्दो धार्मिक तनाव र असहज बन्दै गएको सुरक्षा अवस्थाबारे मधेसवादी दलका नेताहरूसँग छलफल गर्नुभएको छ ।

धार्मिक विवादका कारण उत्पन्न तनाव न्यूनीकरण, साम्प्रदायिक सद्भाव कायम राख्ने उपाय तथा सरकारले तत्काल चाल्नुपर्ने कदमबारे बिहीवार सभापति लामिछानेले मधेशवादी दलहरुसँग परामर्श गर्नुभएको हो । राष्ट्रिय मुक्ति पार्टीका अध्यक्ष राजेन्द्र महतोले रास्वपा सभापति लामिछानेले समस्या हल गर्न सुझाव मागेको बताउनुभयो । उहाँले मधेशमा तनाव बढिरहँदा पनि प्रधानमन्त्री र गृहमन्त्री मौन बसेको भन्दै सरकारको आलोचना समेत गर्नुभयउउो । उहाँले हिंसात्मक गतिविधिमा संलग्नमाथि कानूनी कारबाही गर्न तथा मधेशमा साम्प्रदायिक सद्भाव कायम राख्दै अवस्था सामान्य बनाउन सरकारले तत्काल प्रभावकारी कदम चाल्नुपर्नेमा जोड दिएको बताउनुभयो ।

उहाँले भन्नुभयो, ‘सरकार बेल्कुल संवेदनहीन र गैरजिम्मेवार भएर काम गरिहेको छ । मधेश जलरिहँदा पनि प्रधानमन्त्रीलाई बोल्ने फुर्सद छैन । गृहमन्त्रीलाई पनि त्यहाँ के भइरहेको छ भनेर हेर्ने फुुर्सद भएन । अनि बोल्न र हेर्न फुर्सद नहुने यो कस्तो सरकार हो ? अझ मधेशबाट अपार जनमत लिएर बनेको सरकार पनि हो । त्यसैले हिंसात्मक गतिविधिमा संलग्नमाथि कडाभन्दा कडा कारबाही हुनुपर्छ । मधेशमा सम्प्रदायिक सद्भाव कायम राख्न राखि परिस्थिति सामान्य बनाउन सरकारलाई दिर्नेशन दिन्छौँ भन्नुभएको छ ।’

राष्ट्रिय जनमोर्चाका अध्यक्ष चन्द्रकान्त राउतले पाँच दिनसम्म पनि शव व्यवस्थापन हुन नसक्नु सरकारको गम्भीर कमजोरी भएको भन्दै यस्ता विषयमा सरकार गम्भीर हुनुपर्ने विषयमा ध्यानाकर्षण गराएको बताउनुभयो । उहाँले गोली चलाएको विषयमा सुरक्षाकर्मीको बयानले समेत तनाव बढिरहेको भन्दै सरकारले स्पष्टिकरण दिनुपर्ने कुरा छलफलमा राखेको बताउनुभयो । छलफलमा सभापति लामिछानेले सरकारलाई आवश्यक निर्देशक दिने बताएको राउतको भनाइ छ ।

उहाँले भन्नुभयो, ‘रास्वपाका सभापतिज्यूले उत्पन्न समस्यालाई कसरी हल गर्न सकिन्छ भनेर हामीहरुसँग सुझाव लिनुभयो । एकदमे सकारात्मक पहल रह्यो । हामीले सरकारले तत्काल लिनुपर्ने कदमको बारेमा सुझाव दिएका छौँ । जस्तो कि पाँच दिनसम्म पनि लाश उठ्न सकेन । यस्तो कुरा त एकदुई दिनमै व्यवस्थापन गरिसक्नुपथ्र्यो । अर्को कुरा सुरक्षाकर्मीले आफूहरुले गोली नचलाएको बयान दिँदा दोष अर्को समूदायमाथि गइरहेको देखिन्छ । त्यसकारण यस्तो हुनुहुँदैन । र सरकार प्रवक्ताले बाहिरका सबै भ्रम चिर्ने गरि बोल्नुपर्छ भनेर नै हामीले सुझाव दिएका छौँ ।’