सलमान खानले आफ्नो पारिश्रमिकमा ५० करोड घटाएर खेले फिल्म

मुम्बई, १७ साउन । बलिउडका सुपरस्टार अर्थात ‘बक्स अफिस एटिएम’ का रूपमा चिनिने सलमान खान उद्योगकै सर्वाधिक पारिश्रमिक लिने अभिनेताहरूमध्ये एक हुन्।

पछिल्ला केही वर्षयता उनले प्रति चलचित्र १२० करोड रुपैयाँ पारिश्रमिकका साथै नाफाको हिस्सासमेत लिँदै आएको बताइन्छ। यो पारिश्रमिक पूर्ण रूपमा जायज पनि छ किनभने ‘दबंग’ (२०१०) देखि हालैको चलचित्र ‘सिकन्दर’ सम्म उनका लगातार १८ वटा चलचित्रहरूले १०० करोड, २०० करोड र ३०० करोड रुपैयाँको ‘क्लब’ मा स्थान बनाएका छन्।

तर, हालका रिपोर्टहरूका अनुसार भाइजानले नयनतारासँग अभिनय गर्न लागेको आफ्नो आगामी एक्सन चलचित्र ‘एसभीसी ६३’ का लागि आफ्नो पारिश्रमिकमा उल्लेख्य कटौती गरेका छन्। भनिन्छ कि उनले एक नजिकको साथी प्रतिको सद्भावस्वरूप यस परियोजनाका लागि आफ्नो पारिश्रमिक ५० करोड रुपैयाँले घटाएका छन् ।

सलमान खान यतिखेर वमशी पैदिपल्लीद्वारा निर्देशित र दिल राजुद्वारा निर्मित‘एसभीसी ६३’  को छायाङ्कनमा व्यस्त छन्। यो चलचित्र सन् २०२७ को इदको अवसरमा प्रदर्शन हुने तय गरिएको छ। रिपोर्टहरूका अनुसार उनले यस चलचित्रका लागि ७० करोड रुपैयाँ पारिश्रमिक लिँदैछन्।

फ्री प्रेस जर्नलको एक प्रतिवेदनले उद्योगका भित्री स्रोतहरू र चलचित्रसँग सम्बन्धित व्यक्तिहरूलाई उद्धृत गर्दै यो दाबी गरेको छ। उक्त प्रतिवेदनका अनुसार सलमान र रफी काजी बीचको मित्रताका कारण यो निर्णय लिइएको हो। रफीले नै सलमान खानलाई यस परियोजनामा ​​काम गर्न मनाएका थिए, उनी दिल राजुसँगै यस चलचित्रका सह निर्माता पनि हुन्।

समाचारमा उल्लेख भएअनुसार सलमान, जसको प्रति चलचित्र बजार मूल्य झन्डै दुई दशकदेखि लगातार १२० करोड भारुभन्दा बढी रहँदै आएको छ, ले ‘एसभीसी ६३’ का निर्माताहरूलाई भने यो छुट दिएका हुन् किनभने उनका पुराना मित्र रफी काजी यस परियोजनामा ​​मध्यस्थकर्ताको भूमिका निर्वाह गरिरहेका छन्।

रफीलाई चलचित्रको एक निर्माताका रूपमा पनि श्रेय दिइएको छ । यही मित्रताका कारण सलमान आफ्नो पारिश्रमिकमा उल्लेख्य कटौती गर्न सहमत भएका हुन्।

तर, सलमानको सम्झौतामा चलचित्रको नाफाको हिस्सा पनि समावेश छ कि छैन भन्ने कुरा अझै खुलेको छैन। आफ्नो आधारभूत पारिश्रमिकका अतिरिक्त उनले नाफाको हिस्सा पाउने गरी कुनै सम्झौता गरेको सम्भावना निकै प्रबल छ तर हालसम्म यससम्बन्धी कुनै जानकारी उपलब्ध छैन।

सन् २०१० यता लगातार रूपमा १०० करोड, २०० करोड र ३०० करोड भारतीय रूपैयाँको ‘करोड क्लब’मा प्रवेश गर्ने १८ वटा चलचित्र दिने सलमान खान एकमात्र अभिनेता हुन्। पछिल्ला वर्षहरूमा उनले सामान्यतया नाफाको हिस्सा प्राप्त हुने खालका चलचित्र सम्झौताहरूलाई प्राथमिकता दिँदै आएका छन्।

यसका साथै, ‘दबंग’ (२०१०) देखि यता उनका अधिकांश चलचित्रहरू या त उनको परिवारले निर्माण गरेका छन् वा उनको ब्यानर ‘सलमान खान फिल्म्स’ अन्तर्गत बनेका छन्। ‘दबंग’ स्वयं उनका भाइ अरबाज खानले निर्माण गरेका थिए भने ‘बडीगार्ड’ लाई उनकी बहिनी अल्विरा खान अग्निहोत्रीले निर्माणमा सघाएकी थिइन्।

समयसँगै चलचित्रका कलाकारहरूको पारिश्रमिक लिने तरिकामा परिवर्तन आएको छ । यो अब केवल निश्चित शुल्कमा मात्र सीमित छैन। उदाहरणका लागि सलमान खानलाई नै लिनुहोस्,  हालैका वर्षहरूमा उनले विभिन्न निर्माताहरूसँग काम गर्दा सुरुमै लिने शुल्क कम राखेर चलचित्रको अधिकारमा हिस्सा अर्थात विशेष गरी ओटीटी र स्याटेलाइट अधिकारबाट प्राप्त हुने आम्दानीको केही अंश लिन थालेका छन्। विभिन्न समाचार अनुसार, यी अधिकारहरूको मूल्य मात्रै प्रायः १२० करोडदेखि १४० करोड रुपैयाँको हाराहारीमा हुने गरेको छ।

समाचार अनुसार सलमान खानले ‘एक था टाइगर’, ‘टाइगर जिन्दा है’ र ‘टाइगर ३’ जस्ता चलचित्रहरूका लागि यश राज फिल्म्ससँग एक विशेष सम्झौता गरेका थिए। यस व्यवस्थामा चलचित्रको खुद आम्दानीले निश्चित लक्ष्य पूरा गरेपछि प्राप्त हुने नाफाको हिस्सा पनि समावेश रहेको थियो ।

उल्लेखनीय छ कि सलमान खान चलचित्र उद्योगमा आफ्नो घनिष्ठ मित्रताका लागि परिचित छन्। हालै उनले रितेश देशमुखको चलचित्र ‘राजा शिवाजी’ मा निः शुल्क रूपमा छोटो भूमिका अर्थात क्यामियो निभाएका थिए । यसअघि, अजय देवगनले पनि खुलासा गरेका थिए कि चलचित्र ‘सन अफ सरदार’ को ‘पो पो…’ गीतमा देखा परे बापत सलमानले कुनै पनि पारिश्रमिक लिन अस्वीकार गरेका थिए। अजय देवगनले सम्झँदै भने, ‘सलमानले सहजै भनेका थिए, तिमी साथी हौ। म साथीहरूसँग पैसा लिन्नँ।’

कामको कुरा गर्दा यतिखेर ‘एसभीसी ६३’  बाहेक सलमान खानको चलचित्र ‘मातृभूमि’ पनि तयारी अवस्था छ तर हाल यसको प्रदर्शन रोकिएको छ। समाचारहरूका अनुसार यो चलचित्र गलवान उपत्यकाको हिंस्रक झडपमा आधारित भए तापनि कूटनीतिक कारणले गर्दा सरकार र सेन्सर बोर्डले यसमा चीनले जनाएकाले प्रदर्शनमा ढिलाइ भएको हो।

कुनै समय यस्ता समाचारहरू आएका थिए कि रक्षा मन्त्रालय तथा सूचना तथा प्रसारण मन्त्रालयले चलचित्र निर्माताहरूलाई केही दृश्यहरू परिवर्तन गर्न र कथाको मुख्य केन्द्रबिन्दुलाई हिंस्रक झडपबाट हटाएर त्यसमा संलग्न सेनाका जवानहरूको कथातर्फ मोड्न निर्देशन दिएका थिए। फलस्वरूप, चलचित्रको शीर्षक ‘ब्याटल अफ गलवान’ बाट परिवर्तन गरी ‘मातृभूमि’ मा बदल्नु मात्रै परेन, यसका केही अंशहरू पुनः छायाङ्कन समेत गर्नुपरेको थियो ।