श्रावण २४ गते, २०८३ मा प्रकाशित
ढाका, २४ साउन । गत साता दिल्लीबाट आफ्नो पहिलो सार्वजनिक सम्बोधन गर्ने शेख हसिनाको कदम र स्वदेश फर्कने उनको घोषणाले बंगलादेशमा राजनीतिक हलचल मच्चाएको छ।
तारिक रहमानको नेतृत्वमा रहेको सरकारले शेख हसिनाको सम्बोधन प्रति कडा आपत्ति जनाउँदै यसलाई बंगलादेश तथा जुलाई आन्दोलनका क्रममा ज्यान गुमाउनेहरूको अपमान भनेर प्रतिक्रिया दिएको छ।
यद्यपि, रहमानकै दल बीएनपीका एक सांसदले भने अब अवामी लिगसँगको एकीकरणबारे कुरा भइरहेको बताएका छन्। सुनामगन्ज–२ का सांसद नासिर उद्दिन चौधरीले एक सभामा अवामी लिगलाई बंगलादेश नेसनलिस्ट पार्टीको सहयोगीका रूपमा चित्रण गरेका हुन ।
उनको यो भनाइ बंगलादेशकी पूर्वप्रधानमन्त्री शेख हसिनाले यसै साताको सुरुमा नयाँ दिल्लीमा पत्रकार सम्मेलन गरेको समयमा आएको हो। ‘फरेन करेस्पोन्डेन्ट्स क्लब अफ साउथ एसिया’ ले अगस्ट ५ मा उक्त पत्रकार सम्मेलनको आयोजना गरेको थियो। जसमा हसिना यस कार्यक्रममा भर्चुअल माध्यमबाट सहभागी भएकी थिइन्। त्यतिबेला उनको क्यामेरा बन्द थियो । उनले अडियोमार्फत उपस्थितहरूलाई सम्बोधन गरिन् र प्रश्नहरूको जवाफ पनि दिइन्। ५ अगस्ट २०२४ मा बंगलादेश छोडेयता हसिनाको यो पहिलो सार्वजनिक उपस्थितिको कार्यक्रम रहेको थियो।
जस पत्रकार सम्मेलनमार्फत शेख हसिनाले डिसेम्बरसम्ममा आफू बंगलादेश फर्कने घोषणा गरेकी थिइन्। अवामी लिगकी नेतृले बंगलादेशमा आफू पक्राउ पर्न वा मारिन सक्ने कुराको हेक्का हुँदाहुँदै पनि आफू स्वदेश फर्कने बताइन्। हसिनाले झुटा मुद्दा र ज्यानको खतराले आफ्नो भविष्य निर्धारण गर्न नसक्ने दृढता व्यक्त गरिन्।
हसिनाको यस पत्रकार सम्मेलनको केही दिनपछि नै बीएनपीका एक सांसदले अवामी लिगलाई सहयोगी दलको रूपमा चित्रण गरेका हुन्। यद्यपि, उनको दल बीएनपीले शेख हसिनालाई निरन्तर रूपमा ‘फासिस्ट’ को संज्ञा दिँदै आएको छ र जुलाई आन्दोलनका प्रदर्शनकारीहरूको नरसंहारका लागि उनैलाई जिम्मेवार ठहर्याएको छ।
बंगलादेशको पत्रिका ‘प्रथम आलो’को एक समाचार अनुसार नासिर उद्दिन चौधरीले भविष्यमा यी दुई दलबीच एकीकरण हुन सक्ने सम्भावना पनि व्यक्त गरेका छन ।
चौधरीले भने, ‘अवामी लिग हाम्रो शत्रु होइन, उनीहरू हाम्रा सहयोगी हुन्। हामीले उनीहरूसँग मिलेरै स्वतन्त्रता संग्राम लडेका थियौं। अवामी लिग चाँडै नै बीएनपीमा विलय हुनेछ।’
तर अहिलेसम्म पार्टीभित्र चौधरीको यो भनाइ एक्लो स्वरजस्तै देखिएको छ। अगस्ट ६ मा अर्थात् हसिनाले सम्बोधन गरेको भोलिपल्ट बीएनपीका वरिष्ठ नेता रुहुल कबिर रिजभीले यसको कडा विरोध गरेका थिए। रिजभीले भारतबाट गरिएको हसिनाको सम्बोधनले जुलाई विद्रोहका सहिदहरूको अपमान गरेको टिप्पणी गरेका थिए ।
डेली स्टारको एक समाचार अनुसार रिजभीले दाबी गरे कि हसिनाको सम्बोधनको समय भारतीय नीति निर्माताहरूले तय गरेका थिए। उनले यसलाई जुलाई २०२४ को क्रान्तिका सहिदहरूको जानाजान गरिएको अपमानको रूपमा वर्णन भने गरेका छन । उनले भारतीय भूमिबाट हसिनालाई वक्तव्य जारी गर्न दिनु बंगलादेशको सार्वभौमिकताको उल्लंघन भएको बताउन भने छाडेनन् ।
अन्य समाचारहरु
