भाद्र ३ गते, २०८३ मा प्रकाशित
-अर्घाखाँची डटकम
अर्घाखाँची । नेपाली कांग्रेसका केन्द्रीय सदस्य कमलप्रसाद भुसालले पार्टीको आगामी नेतृत्वमा महामन्त्री गगन थापालाई अघि बढाउँदै पूर्वसभापति शेरबहादुर देउवाले अभिभावकीय भूमिका निर्वाह गर्नुपर्ने धारणा व्यक्त गरेका छन्।
कांग्रेसको १५औँ महाधिवेशनको तयारी, पार्टीको भावी नेतृत्व, संगठन सुदृढीकरण तथा पछिल्लो राजनीतिक अवस्थाबारे धारणा राख्दै भुसालले बदलिँदो राजनीतिक परिवेशअनुसार कांग्रेसले नयाँ पुस्ताको ऊर्जा र पुरानो पुस्ताको अनुभवलाई समन्वय गरेर अघि बढ्नुपर्ने बताए।
उनले गगन थापामा नयाँ पुस्ता र बदलिँदो राजनीतिक अपेक्षालाई सम्बोधन गर्दै पार्टीलाई नयाँ ढंगबाट अघि बढाउन सक्ने क्षमता रहेको उल्लेख गरे। “नयाँ पुस्तालाई नेतृत्वमा अघि बढ्न सहज वातावरण बनाउनुपर्छ, अनुभवी नेताहरूले मार्गदर्शन गर्ने भूमिका खेल्नुपर्छ,” भुसालको भनाइ छ।
पूर्वसभापति देउवाको लामो राजनीतिक अनुभव कांग्रेसका लागि महत्वपूर्ण सम्पत्ति भएको बताउँदै भुसालले अब उहाँले नेतृत्वको प्रत्यक्ष प्रतिस्पर्धाभन्दा अभिभावकीय र मार्गदर्शक भूमिका निर्वाह गर्नुपर्ने बताए।
नयाँ पुस्तालाई अवसर दिँदै पुरानो पुस्ताको अनुभवलाई पार्टी निर्माणमा उपयोग गर्न सके कांग्रेसभित्र पुस्तान्तरण सहज हुने र संगठन थप मजबुत बन्ने उनको धारणा छ।
भुसालले कांग्रेसको १५औँ महाधिवेशनलाई पार्टीको नियमित लोकतान्त्रिक अभ्यासका रूपमा लिँदै समयमै महाधिवेशन सम्पन्न गर्न सदस्यता व्यवस्थापन, नियमावली, निर्वाचन निर्देशिका र संगठनात्मक तयारीलाई पारदर्शी तथा व्यवस्थित बनाउनुपर्ने बताए।
सदस्यता वितरण र नवीकरणमा निष्पक्षता कायम गर्नुपर्ने उल्लेख गर्दै उनले महाधिवेशनलाई स्वच्छ र विवादरहित बनाउन सबै पक्ष जिम्मेवार बन्नुपर्नेमा जोड दिए।
कांग्रेसभित्र देखिने गुटबन्दी अन्त्य गर्न नेतृत्वले सबै पक्षलाई समेटेर अघि बढ्नुपर्ने भुसालले बताए। महाधिवेशनमा विचार र नेतृत्वका लागि प्रतिस्पर्धा स्वाभाविक भए पनि निर्वाचनपछि सबै कांग्रेसको साझा उद्देश्यमा एकताबद्ध हुनुपर्ने उनको भनाइ छ।
उनले व्यक्तिभन्दा पार्टी र पार्टीभन्दा जनताको हितलाई प्राथमिकता दिन सके कांग्रेस थप बलियो बन्ने बताए।
प्रमुख प्रतिपक्षी दलका रूपमा सरकारको कार्यसम्पादनप्रति असन्तुष्टि जनाउँदै भुसालले नागरिकले अपेक्षा गरेअनुसार सेवा प्रवाह, विकास निर्माण र सुशासनको अनुभूति गर्न नसकेको बताए।
सुशासन आवश्यक भए पनि त्यसका नाममा नागरिक, निजी क्षेत्र, सञ्चार क्षेत्र तथा व्यवसायीलाई त्रसित बनाउने काम गर्न नहुने उनको भनाइ छ। भ्रष्टाचार र अनियमिततामाथि निष्पक्ष, पारदर्शी र प्रमाणमा आधारित अनुसन्धान तथा कानुनी कारबाही हुनुपर्ने उनले बताए।
लुम्बिनी प्रदेश कांग्रेसको महत्वपूर्ण आधार क्षेत्र भएकाले संगठनलाई थप मजबुत बनाउनुपर्ने भुसालले बताए। कार्यकर्ताको सम्मान, आन्तरिक मतभेदको व्यवस्थापन र जनतासँगको सम्बन्ध विस्तारलाई प्राथमिकता दिनुपर्ने उनको धारणा छ।
उनले कांग्रेसले अब विगतको गौरवमा मात्र होइन, भविष्यको भरोसामा राजनीति गर्नुपर्ने बताए।
अन्य समाचारहरु
