भाद्र ३० गते, २०८३ मा प्रकाशित
काठमाडौँ । प्रमुख प्रतिपक्षी नेपाली कांग्रेसले विपद् व्यवस्थापनका लागि उच्चस्तरीय संसदीय समिति गठन गर्न सभामुखको ध्यानाकर्षण गराएको छ ।
कांग्रेस संसदीय दलका नेता भीष्मराज आङ्देम्बेले मंगलबार सिंहदरबारमा सभामुख डोलप्रसाद अर्यालसँग भेट गरी सर्वदलीय बैठकमा उठेको उच्चस्तरीय संसदीय समिति गठनको प्रस्ताव अझै कार्यान्वयन नभएको भन्दै ध्यानाकर्षण गराएका हुन् ।
आङ्देम्बेका अनुसार सत्तापक्षका सभापतिको आह्वानमा बसेको सर्वदलीय बैठकमा विपद् व्यवस्थापनका लागि समिति गठन गर्ने विषय उठेको थियो । संसद्को रोस्ट्रमबाट समेत सम्बोधन भएको तीन साता बितिसक्दा पनि समिति गठन नभएको भन्दै उनले अब एक साताभित्र समिति बनाउन आग्रह गरेका छन् ।
उनले प्रस्तावित समिति सरकारको विरोधका लागि नभई सरकारलाई थप जिम्मेवार र व्यवस्थित बनाउन तथा पहुँच नपुगेका क्षेत्रमा राहत पुर्याउन सहयोगी बन्ने बताए । भेटका क्रममा विपद्का कारण स्थगित भएको प्रधानमन्त्रीसँगको प्रत्यक्ष प्रश्नोत्तर कार्यक्रमलाई समेत अघि बढाउन सभामुखको ध्यानाकर्षण गराइएको आङ्देम्बेले जानकारी दिए ।
अन्य समाचारहरु
