आश्विन ८ गते, २०८३ मा प्रकाशित
८ असोज । भारतको उत्तर प्रदेशस्थित ग्रेटर नोएडाको यमुना एक्सप्रेसवेमा स्लीपर बसमा आगलागी हुँदा नौ यात्रुको मृत्यु भएको छ। घटनापछि जीवित यात्रु तथा प्रत्यक्षदर्शीले सुनाएका अनुभवले दुर्घटनाको भयावह अवस्था देखाएको छ।
दिल्लीको कश्मीरी गेटबाट महोबा जाँदै गरेको राज कल्पना ट्राभल्सको बसमा बुधबार राति करिब ११:३० बजे आगलागी भएको हो। यमुना एक्सप्रेसवेअन्तर्गत जीरो पोइन्टबाट करिब ३२ किलोमिटर अगाडि जेवर थाना क्षेत्रको सडकमा बसमा आगो लागेको बताइएको छ।
प्रत्यक्षदर्शीका अनुसार आगलागीपछि बसभित्र बाक्लो धुवाँ भरिएको थियो। यात्रुहरू एकैपटक बाहिर निस्कन खोज्दा बसभित्र ठूलो भीड र भागदौड मच्चिएको थियो।
एक यात्रुले आफू बसको पछिल्लो सिटमा सुतिरहेको बेला आगलागीबारे थाहा पाएको बताए। उनका अनुसार बसको अगाडिको भागमा आगो लागेको थियो। बाहिर निस्कने क्रममा धुवाँले केही देख्न नसकिने अवस्था रहेको र यात्रुहरूले एकअर्कालाई धकेल्दै जसरी पनि बाहिर निस्कने प्रयास गरेको उनले बताए।
‘जुत्ता लगाउने समय पनि भएन’
घटनाकी प्रत्यक्षदर्शी रिंकी राजपूतले आफू बसमा सुतिरहेको बेला कसैले गेट ढकढक्याएपछि उठेको बताइन्। बाहिर निस्कने बेलासम्म बसमा अत्यधिक भीड भइसकेको र धुवाँले श्वास फेर्नसमेत कठिन भएको उनले बताइन्।
रिंकीका अनुसार उनले आफ्नो सामानसमेत निकाल्न पाइनन्। ‘जुत्ता लगाउने समय पनि भएन, फोन मात्रै लिएर बाहिर निस्किएँ,’ उनले घटनाको अनुभव सुनाउँदै भनिन्। उनका अनुसार बसभित्र यात्रुहरू एकअर्कालाई धकेल्दै बाहिर निस्कन खोजिरहेका थिए। धुवाँका कारण केही देख्न नसक्ने अवस्था थियो। आफूलाई कसैले तानेर बाहिर निकालेपछि त्यसपछिको धेरै कुरा सम्झना नरहेको उनले बताइन्।
उनले बसको अगाडिको भाग, चालक बस्ने ठाउँनजिकैबाट आगो सुरु भएको आफूले देखेको बताएकी छन्। उनका अनुसार थोरै यात्रु मात्र बाहिर निस्कन सफल भए भने केही यात्रु बसभित्रै फसेका थिए।
एफआईआरमा चालक–परिचालकमाथि गम्भीर आरोप
बसमा सवार सुनील कुमारको उजुरीका आधारमा दर्ता भएको एफआईआरमा आगलागीअघि नै बसबाट जलिरहेको गन्ध आएको उल्लेख छ। सुनीलका अनुसार बसमा करिब ३० देखि ३५ जना यात्रु सवार थिए। यमुना एक्सप्रेसवेमा पुगेपछि चालक बस्ने अगाडिको भागबाट जलिरहेको जस्तो गन्ध आउन थालेको र केही यात्रुले चालक तथा परिचालकलाई जानकारी गराएको एफआईआरमा उल्लेख छ।
तर चालकले उक्त गन्धलाई गम्भीर रूपमा नलिएको र बसमा यस्तै गन्ध आउने गरेको जवाफ दिएको आरोप छ। चालक र परिचालकले क्याबिनमा बिँडी तथा चुरोट सेवन गरिरहेको आरोपसमेत एफआईआरमा लगाइएको छ।
केही समयपछि चालकको सिटनजिकैबाट आगोको ठूलो लप्का निस्कन थालेपछि यात्रुले बस रोक्न आग्रह गरेका थिए। तर बस रोक्न ढिलाइ भएको र त्यसबीच आगो तीव्र गतिमा फैलिएको सुनीलको आरोप छ।
बस रोकिएपछि केही यात्रु झ्यालबाट हाम्फालेर तथा विभिन्न बाटोबाट बाहिर निस्कन सफल भएका थिए। तर आगो र धुवाँका कारण केही यात्रु बसभित्रै फसेका थिए।
उद्धारपछि नौ जनालाई उपचारका लागि कैलाश अस्पताल, जेवर लगिएकोमा चिकित्सकले मृत घोषणा गरेको बताइएको छ। मृतकको पहिचान तथा घटनाको थप विवरणबारे प्रहरीले अनुसन्धान गरिरहेको छ।
बसभित्र फसेका यात्रुलाई निकाल्न स्थानीयले आगो निभाउने सिलिन्डर प्रयोग गरी झ्यालका सिसा फुटाउने प्रयाससमेत गरेका थिए। घटनापछि चालक र परिचालक फरार भएको बताइएको छ।
फायर ब्रिगेडको टोलीले घटनास्थलमा पुगेर आगो नियन्त्रणमा लिएको थियो। त्यसपछि बसलाई पूर्ण रूपमा चिस्याउने ‘कुलडाउन’ प्रक्रिया गरिएको थियो।
आगलागीको वास्तविक कारण भने अझै खुल्न सकेको छैन। प्रहरीले चालक, परिचालक तथा प्रत्यक्षदर्शीसँग सोधपुछ गरी घटनाबारे अनुसन्धान अघि बढाएको छ।
घटनाप्रति उत्तर प्रदेशका मुख्यमन्त्री योगी आदित्यनाथले चासो व्यक्त गर्दै घाइतेको उचित उपचार तथा मृतकका परिवारलाई आवश्यक सहयोग उपलब्ध गराउन निर्देशन दिएका छन्।
अन्य समाचारहरु
