ताप्लेजुङका विभिन्न गाविसमा गएको पहिरोमा परी मृत्यु हुनेको संख्या ३० पुगेको छ। धेरै मानिस बेपत्ता भएकाले मृत्यु हुनेको संख्या बढ्न सक्ने बताइएको छ।
लिवाङ गाविसमा एकै परिवारका ९ सहित १८ जनाको मृत्यु भएको प्रहरीले जनाएको छ। लिवाङ-१ मा एउटै घरमा सन्तहान फेन्सोहाङको परिवारका ९ जनाको शव फेला परेको हो। सन्तहाङ फेम्सोहाङ, आइतमाया फेम्सोहाङ, शिक्षा फेम्सोहाङ, जुनु फेम्सोहाङ, प्रेम फेम्सोहाङ, अन्जु फेम्सोहाङ, शिशिर फेम्सोहाङ, सपना फेम्सोहाङ, तीन महिनाको नाम नखुलेको बच्चा र लेलेपबाट पाउना बस्न आएकी राई थरकी एक महिलाको शव भेटिएको हो । सन्तमान भने बेपत्ता छन्।
लिवाङ-१ मा नै निमा खाङ्दु शेर्पा र उनको नातीको समेत मृत्यु भएको छ भने चन्द्र घिमिरे र नारायण अधिकारी बेपत्ता छन्। लिवाङमा थप छ जनाको शव भेटिएको स्थानीयले बताएका छन्।
थिम्लाबु गाविसको याकफेदीमा ५ जनाको शव भेटिए पनि सनाखत हुन सकेको छैन। खोप्लिङ-७ धुसेनीमा पहिरोमा परी ११ वर्षीय सविन मादेन र ८ वर्षीय वसन्त बिकको मृत्यु भएको छ। यस्तै लिङ्तेक-१मा चमेली भनिने आइतबहादुर लिम्बुकी छोरीको मृत्यु भएको छ।
सान्थाक्रा-३मा अमरबहादुर लिवाङ र उनका एक नाती तथा लिङ्तेन-१मा मनमाया लिम्बुको मृत्यु भएको प्रहरीले जनाएको छ। जिल्लाभरी १० जनाभन्दा बढि गम्भिर घाइते भएको जिल्ला प्रहरी कार्यालाय ताप्लेजुङले जनाएको छ। सेतोपाटीमा समाचार छ ।
जेष्ठ २८ गते, २०७२ मा प्रकाशित
