रसुवाको चिलिमेतर्फ जाँदै गरेको यात्रुवाहक बस दुर्घटना हुँदा ३३ जनाको मृत्यु, कयौ घाइते

रसुवाको राम्चे गाउँ विकास समितिको ग्राङमा मंगलबार दिउँसो भएको यात्रुबहाक बस दुर्घटनामा ३३ जनाको मृत्यु भएको छ ।

घटनास्थलमा २९ जनाको र उपचारका क्रममा ४ जनाको मृत्यु भएको जिल्ला प्रहरी कार्यालय रसुवाले जनाएको छ । बस चालकबाहेक अन्य मृतकहरुको सनाखत हुने सकेको छैन ।

दुर्घटनामा ३५ जनाभन्दा बढी घाइते भएका छन् । अस्पतालमा उपचारका क्रममा मृत्यु भएकी एक महिलाको साथमा रहेका अन्दाजी दुई वर्षका बालक भने सकुशल रहेको प्रहरीले जनाएको छ ।

घाइतेहरुको धुन्चे अस्पताल, त्रिशुली अस्पतालमा उपचार भइरहेको छ भने गम्भीर घाइते केहीलाई काठमाडौं पठाइएको छ । रसुवा र नुवाकोटबाट गएका प्रहरीहरुले भीरबाट शव निकाल्नुका साथै घाइतेहरुलाई उद्धार गरेका थिए ।

बा३ख ५७०६ नम्बरको बस दिउँसो पौने १ बजेतिर दुर्घटनामा परेको हो । इन्धन अभाव र रसुवा जाने पहिलो बस भएकाले यात्रुहरुको अत्यधिक चाप रहेकाले दुर्घटनामा धेरै मानवीय क्षति भएको बताइएको छ ।

दुर्घटनाको कारण भने खुल्न सकेको छैन । इमेजखबरमा समाचार छ ।