सत्तारुढ एमालेको भातृ संगठन युवा संघले आन्दोलनरत मधेसी मोर्चाका चार शीर्ष नेतालाई राज्यद्रोहको मुद्दा लगाई कारबाही गर्न माग गरेको छ । राज्यलाई कमजोर बनाउने र राज्यविरुद्ध नै उनीहरुका गतिविधि केन्द्रित भएको भन्दै युवा संघले संघीय फोरम अध्यक्ष उपेन्द्र यादव, तमलोपा अध्यक्ष महन्थ ठाकुर, सद्भावना अध्यक्ष राजेन्द्र महतो र तमसपा अध्यक्ष महेन्द्र राय यादवलाई कारबाही गर्न माग गरेको हो ।
संघले सोमबार राजधानीमा पत्रकार सम्मेलन गरी आन्दोलनका नाममा भएका गतिविधिले अब हद नाघेको टिप्पणी गरेको छ । मधेसी दलहरुका माग नै मधेस विरोधी खालका छन्, संघका अध्यक्ष राजीव पहारीले भने, आन्दोलन राज्यविरुद्ध केन्द्रित भएकाले चारजना नेतालाई राज्यद्रोहको मुद्दा लगाई आजीबन कारावासको व्यवस्था हुनुपर्छ ।
मुलुकलाई नै समस्यामा पार्ने खोज्नेहरुलाई राज्यले चिनेर त्यहीअनुसारको व्यवहार गर्नुपर्ने पहारीले बताए । संघले तराई मधेसमा भइरहेको शोषण उत्पीडितविरुद्ध र मधेसी दलहरुले फैलाएको भ्रम चिर्न तराई मधेस जागरण अभियान सञ्चालन गर्ने पनि घोषणा गरेको छ । यसका लागि संघले १८ जिल्लामा अभियान चलाउने भएको छ ।
अभियानका लागि संघले केन्द्रिय प्रतिनिधि पनि तोकेको छ । दुई महिनासम्म अभियान सञ्चालन हुनेछ । संघले राष्ट्रपति विद्यादेवी भण्डारीमाथि जनकपुरमा भएको दुव्र्यवहारप्रति पनि आपत्ति जनाएको छ । संघले दोषिमाथि कारबाही गर्न सरकारको ध्यानाकर्षण गराएको छ । राष्ट्रपतिको अपमान मुलुकै अपमान भएको संघको निष्कर्ष छ । ईकान्तिपुरमा समाचार छ ।
पौष ६ गते, २०७२ मा प्रकाशित
