उच्चमाध्यामिक शिक्षा परिषद्ले कक्षा ११ को नतिजा बिहीबार प्रकाशित गरेको छ। गत असार मसान्तसम्म संचालित परीक्षामा विज्ञान,ब्यवस्थापन,मानविकी र शिक्षा संकायका गरी नियमित तर्फ कुल २ लाख ४३ हजार ७ सय ३१ ले परीक्षा दिएकोमा यस वर्ष १ लाख १९ हजार ९ सय १६ परीक्षार्थी उत्तिर्ण भएको परीक्षा नियन्त्रक सन्तोष अर्यालले जनाए। नियमति तर्फ यस वर्ष ४९.२०प्रतिशत विद्यार्थी पास भएका हुन्। गत वर्ष कक्षा ११ मा ४७.२६ प्रतिशत मात्र पास भएका थिए । यस वर्ष १.९४ प्रतिशत नतिजा बृद्धि भएको छ।
बैशाख १२ गतेको विनाशकारी भूकम्पका बावजुद नतिजा बढ्नुलाई नियन्त्रक अर्यालले सकरात्मक रुपमा लिएका छन् । भूकम्पका कारण परिषद्ले यस वर्ष असार १ र असार २४ गते गरी दुई चरणमा परीक्षा संचालन गरेको थियो, नियन्त्रक अर्यालले नागरिकन्युजसँग भने, ठूलो मानसिक तनावका बाबजुद विद्यार्थीको नतिजा यस वर्ष करिब २ प्रतिशतले बृद्धि भएको छ। यो सकरात्मक पक्ष हो। उनले थपे, अझै पनि करिब ५१ प्रतिशत विद्यार्थी फेल छन् । यस विषयमा परिषदले विश्लेषण गरी सुधारतर्फ लाग्ने छ।
परीक्षा नियन्त्रक अर्यालका अनुसार आंसिक तर्फ १ लाख २६ हजार ९ सय ३०ले परीक्षा दिएकोमा ४३ हजार ९ सय ८३ पास भएका छन् । यो ३४.६५ प्रतिशत हो । नियमित तर्फ ४ र आंसिक तर्फ ५ गरी कुल ९ परीक्षार्थीको परीक्षाको नतिजा स्थगित गरिएको छ भने ९६ परीक्षार्थी अनीयमित कार्य गरेकोले परीक्षा रद्द गरिएको उनले जनाए । एक विषयमा अनुत्तिर्ण परीक्षार्थीहरुले माघ २९ गते मौका परीक्षा दिन पाउने ब्यवस्था परीषदले तय गरेको उनले जनाए । नागरिकन्युजमा समाचार छ ।
पौष ३० गते, २०७२ मा प्रकाशित
