सिन्धुपाल्चोकका उद्योगी व्यवसायीहरुले चीनसँग जोडिएको तातोपानी नाका तत्काल खुलाउने पहल गर्न माग गर्दै प्रधानमन्त्री केपी शर्मा ओलीको ध्यानाकर्षण गराएका छन् ।
नेपाल ट्रक कन्टेनर व्यवसायी संघ, सिन्धुपाल्चोक उपभोक्ता उद्योग वाणिज्य संघ र राष्ट्रिय वाणिज्य संघ सिन्धुपाल्चोकका प्रतिनिधिहरुले आज प्रधानमन्त्री निवास बालुवाटारमा पुगेर तातोपानी नाका तत्काल खुलाउने पहल गर्न माग गरेका हुन् ।
उनीहरुले भूकम्पपछि तातोपानी नाका ठप्प हुँदा सिन्धुपाल्चोकका व्यवसायीको आर्थिक अवस्था कमजोर भएको र मुलुकलेसमेत ठूलो क्षति बेहोरेको भन्दै चीन भ्रमणका क्रममा नाका खोल्ने पहल गर्न प्रधानमन्त्रीको ध्यानाकर्षण गराए ।
व्यवसायीहरुले खासामा पाँच अर्ब रुपैयाँ बराबरको सामान थन्किएको जानकारी गराएका थिए । उनीहरुले अरनिको राजमार्गको स्तरोन्नति गर्नसमेत माग गरेका छन् ।
त्यस क्रममा प्रधानमन्त्री ओलीले व्यवसायीहरुका मागप्रति आफू सकारात्मक रहेको भन्दै चीन भ्रमणका क्रममा ती मागलाई सम्बोधन गर्न प्रयास गर्ने आश्वासन दिए । – इमेजखबरमा समाचार छ ।
चैत्र २ गते, २०७२ मा प्रकाशित
