नेकपा माओवादी केन्द्रले सरकारलाई दिएको समर्थन फिर्ता लिएको छ । समर्थन फिर्ता लिएसँगै माओवादी केन्द्र मंगलबारैदेखि सरकारबाट बाहिरिएको छ ।
मंगलबार राजधानीमा पत्रकार सम्मेलन गरी माओवादी केन्द्रले सरकारबाट बाहिरिने औपचारिक घोषणा गरेको हो ।
माओवादी केन्द्रले राजीनामा दिएर नयाँ सरकार गठनको बाटो खोल्न प्रधानमन्त्री केपी ओलीलाई आग्रह पनि गरेको छ ।
पत्रकार सम्मेलनमा माओवादी केन्द्रका नेता कृष्णबहादुर महराले नेपाली कांग्रेसले पुष्पकमल दाहालको नेतृत्वमा सरकार बनाउन लिखित प्रतिबद्धता जनाइसकेको दाबी गरे ।
उनले पहिलो चरणमा केही समयका लागि दाहाल प्रधानमन्त्री बन्ने बताए ।
आन्दोलनरत् मधेसी दललाईसमेत सरकारमा सामेल गरेर सहमति खोज्ने गरी माओवादी केन्द्र र नेपाली कांग्रेसबीच छलफल भइरहेको बुझिएको छ ।
माओवादी केन्द्रले राष्ट्रपति विद्या भण्डारी र प्रधानमन्त्री केपी ओलीलाई सरकारबाट समर्थन फिर्ता लिने निर्णयबारे जानकारी गराएका छन् ।
उनीहरुले सरकारबाट बाहिरिने निर्णयको पत्र राष्ट्रपति भण्डारी र प्रधानमन्त्री ओलीलाई बुझाएका हुन् । इमेजखबरमा समाचार छ ।
आषाढ़ २८ गते, २०७३ मा प्रकाशित
