प्रमुख विपक्षी दल एमालेले प्रधानमन्त्री पुष्पकमल दाहालले संविधान संशोधनका लागि भारतीय प्रधानमन्त्री नरेन्द्र मोदीलाई पत्र पठाएको दाबी गरेको छ । उसले दाहालको पत्रले नेपालीको शीर निहुर्याउने काम गरेको बताएको छ ।
साता दिनसम्म चलेको स्थायी कमिटी बैठकका निर्णय सार्वजनिक गर्न बुधबार पार्टी कार्यालयमा भएको पत्रकार सम्मेलनमा एमाले महासचिव ईश्वर पोखरेलले पत्र सार्वजनिक गर्न माग गरे । संविधानमा संशोधनलगायत आन्तरिक मामिलाबारे प्रधानमन्त्रीबाट भारतीय प्रधानमन्त्रीलाई पत्र पठाइएको चर्चा सार्वजनिक भएको छ । यस्तो कार्यले हाम्रो स्वाधीनता र स्वतन्त्र निर्णय गर्ने हैसियतमा आँच पुर्याएको छ र आन्तरिक मामिलामा अवाञ्छित बाह्य चासो निम्त्याउने त्रूटिपूर्ण कार्य भएको छ, बैठकपछि जारी विज्ञप्तीमा भनिएको छ, बैठकले प्रधानमन्त्रीबाट पठाइएको भनिएको पत्र सार्वजनिक गर्न माग गरेको छ ।
महासचिव पोखरेलले प्रधानमन्त्रीको पत्रले सार्वभौम मुलुकको स्वतन्त्र निर्णय गर्ने अधिकार कुण्ठित भएको बताए । उनले सरकारले पूर्णता नपाउँदै र परराष्ट्र मन्त्रालयको जिम्मेवारी कसैलाई नसुम्पदै सामान्य कुटनीतिक अभ्यासमा गलत अर्थ लाग्ने गरी दुई छिमेकी देशहरूमा प्रधानमन्त्रीद्वारा विशेष दूत खटाउने कार्यको पनि विरोध गरे । कान्तिपुरमा समाचार छ ।
भाद्र ८ गते, २०७३ मा प्रकाशित
-1000x0.jpg)
