शून्य छ (गज़ल)

– कोमल भट्ट
च.न.पा-१३, काठमाडौँ
हाल:-  न्युयोर्क, अमेरिका 
गयौ तिमी,मन शून्य छ
निवास,आँगन शून्य छ 
सहस्र दर्द छ देहमा 
छ रुद्ध धड्कन शून्य छ
सताउँदै छ उजाडले
फुलेन कानन शून्य छ 
रहेन आस बहारको 
उडेर शोभन शून्य छ
निकास बन्द छ आँसुले 
छ तीव्र रोदन शून्य छ
लग्यो चुँडेर निष्ठुरले
दुखेर आसन शून्य छ 
न बज्छ गीत मिठासको 
न चल्छ वाहन,शून्य छ   
छिनेछ तार सितारको 
सुनिन्न गायन शून्य छ   
लुट्यो सुशान्ति वियोगले
बढेर उल्झन शून्य छ 
विदीर्ण भो तन बेसरी 
प्रगाढ चिन्तन शून्य छ  
धुजा भए सब चाहना  
विरक्तले पन शून्य छ 
छ अन्धकार जताततै 
निभेछ रोशन शून्य छ   
निल्यो सदैव हताशले
फुरेन सिर्जन शून्य छ  
भएन छङ्ङ कतै पनि 
धिमा छ लोचन शून्य छ 
रिझेन दैव कसै गरी 
पुकार,साधन शून्य छ  
थचारिए परिकल्पना
समग्र वाञ्छन शून्य छ  
निसासिँदै छु पला पला 
खुलेन जीवन शून्य छ  
ISI  SII  SIS
तालूङ छन्द
गण :- ज भ र
विश्राम:- ४ अक्षरमा
 

अन्य समाचारहरु

७ सर्जकका ९ बालकथा कृतिहरू एकसाथ विमोचन

चर्चाको शिखरमा ‘MRR भजन’ : युवापुस्तामा अध्यात्म र भजनतर्फ बढ्दो आकर्षण

युगकवि सिद्धिचरण श्रेष्ठको ११५औं जन्म जयन्ती मनाइदै

रुदाने हुन्थे नारायणगोपालको ड्राइभर, लरी चलाएर सधै लान्थे सिंहदरवार

लोकप्रिय गायक मोतिराज खनाल र यशोदा कार्कीको आवाजमा ‘बैगुनी मायालु’ सार्वजनिक

धुँवा र मद्यपानले घट्दो जीवनशक्ति- (कविता)