नरपानी बस दुर्घट्नामा भाग्यले बाँचेका यी तीन बच्चाहरू, एकले त आमा नै गुमाएपछि

सन्धिखर्क, अर्घाखाँची (अर्घाखाँचीडट्कम) । अर्घाखाँची जिल्लाको  नरपानीमा भएको बस दुर्घटनामा यो समाचार तयार पार्दा सम्म मृत्यु हुनेको संख्या १९ पुगेको छ ।  सन्धिखर्कबाट बुटवल जाँदै गरेको लु २ ख २१४८ नम्बरको बस सन्धीखर्क नगरपालिका नरपानीमा दुर्घटना भएको थियो । नरपानीमा भएको बस दुर्घटना तीव्र गतिका कारण भएको घाईतेहरुले बताएका छन् । दुर्घटनामा परि घाईते भएकाहरुको रुपन्देहीका विभिन्न अस्पतालमा उपचार भइरहेको छ ।

चौराह अस्पतालमा ९ जनाको उपचार भइरहेको छ । क्रिमशन अस्पतालमा २ जना र भैरहवा मेडिकल कलेजमा ४ जनाको उपचार भइरहेको प्रहरीले बताएको छ । चौराह अस्पतालमा उपचारर्थ ९ जना मध्ये ३ जना नाबालक छन् ।

अर्घाखाँची सन्धीखर्क नगरपालिका–७ का साढे २ वर्षीय रिजन कुँवर चौराह अस्पतालको आकस्मिक कक्षमा छन् । उनको टाउकोमा चोट लागेको छ । आमा सपना कुँवर पनि घाइते अवस्थामा छिन । उनको पनि टाउकोमा चोट लागेको छ । चौराह अस्पतालको आकस्मिक कक्षमा आमा सपना र २ वर्षीय छोरा रिजन एउटै बेडमा उपचार गरिरहेका छन् । आमा छोराको हेराहेर हुन्छ तर दुवै राम्रोसँग बोल्न सक्ने अवस्थामा छैनन् ।

चौराह अस्पतालमा कपिलबस्तु कोईली बनगाईका ३ वर्षीय स्पर्श पोखरेलको पनि उपचार भइरहेको छ । उनको पनि टाउको चोट लागेको छ । आमा विमला पोखरेल पनि घाईते अवस्थामा छिन् ।उनको मेडिकल कलेजमा उपचार भइरहेको छ । विमलाका कान्छो ३ महिनाको छोरा शोभाखर पोखरेल अहिलेसम्म बेपत्ता छन् ।

त्यसैगरी सन्धिर्खक नगरपालिका–७ खाँचीकोटका १ वर्षीय गणेश पुरी पनि घाईते अवस्थामा अहिले चौराह अस्पतालमा उपचार भइरहेको छ। उनकी आमा माया पुरीको भने घटनास्थलमै मृत्यु भएको बताइएको छ । अधिकांश दुर्घटनामा बच्चाहरु घाईते हुने गरेको भेटिन्छ । अर्घाखाँचीको यो दुर्घटनामा पनि भाग्यले यी तीन बालबालिको ज्यान बचेको छ । सवै बच्चाहरुको टाउको र हातमा चोट लागेको छ ।

दुर्घटनामा घाइते भएकी ४ वर्षिय अञ्जना पौडेल भण्डारी जो हिँजो मम्मी भोक लाग्यो भन्दै कराएकी थिइन् । उनकी आमा कहाँ थिइन् थाहा थिएन । पछि  आमालाई बुटवलको अस्पतालमा उपचार गराइरहेको पाइएको थियो भने परिवारले प्रहरीको सरक्षणबाट ती बालिकालाई घर लिएर गएका थिए ।

बस दुर्घटनामा २७ वर्षिया सिता बस्नेतको ज्यान गएको छ । ज्यान गुमाएकी बस्नेत, शितगंगा २ घर भइ हाल कपिलबस्तु बाणगंगा नगरपालिका – ८ चप्परगाउँ बस्दै आएकी थिइन ।

चालकले धेरै तीव्र गतिमा गाडी चलाएका थिए । स्पीड नचलाउनु भन्दा भन्दै पनि गाडी मालिक वसन्त थापाले भोलि छिटो फर्कनु छ भन्दै गाडी चालकलाई भनेको हामीले सुनेका थियौं । बस तीव्र गतिले हुईकिदा ब्रेक लागेन र दुर्घटना भयो । बाटो सजिलो भएको ठाउँमा दुर्घटना भएको हो । बस मालिक र चालककै लापरबाहीले यो दुर्घटना भएको हो । म बस पल्टदा ३/४ भर्लङ खाए । त्यसपछि उछिटिए । त्यसपछि मेरो होस हराएछ । पछि होसमा आउदा मलाई बाटोमा निकाल्नु भएको थियो । – १९ वर्षीय लोकनाथ पाण्डे, छत्रदेव गाउपालिका वडा नं. ७ घाईते ।

बस एकदम कुदेको थियो । म बच्चासँग साथमा थिए । बसका चालक र बस मालिकले अगाडिले के के कुरा गरिरहेका थिए, मैले सुनिन । हामी अलि पछाडि थियौं । तर घुम्ती आउनसाथ एक्कासी ठूलो आवाज आयो । त्यसपछि मैले केही थाहा पाईन । अलिअलि चिच्चाएको आवाज सम्झन्छु । म बससँगै तलै खसेको थिए रे । पछि होसमा आउँदा मलाई बुटवल ल्याईदैरहेछ । दुर्घटनाको कारण बसको तीव्र गति नै हो जस्तो लाग्छ । भाग्यले बाँचियो । छोरा पनि बाँच्यो । –२३ वर्षीया सपना कुँवर, अर्घाखाँची सन्दीखर्क नगरपालिका–७ ।

घाईतेहरुलाई रगत आवश्यक पर्न सक्ने भन्दै बुटवलका रक्तदान अभियान्ताहरु अस्पतालमा पुगेका छन् । रगत आवश्यक पर्न सक्ने भएकाले घाईते भएका अस्पताहरुमा ४ जना रक्तदाताहरुलाई पूर्व तयारी अनुरुप राखिएको छ । गोर्खाली युवा सशक्तिकरण संस्थाका भरतजंग क्षेत्रीले रगत आवश्यक पर्न सक्ने घाईतेहरु भएका अस्पतालमा रक्तदाताहरुलाई राखेको बताए । उनले अहिले सम्म कसैलाई पनि रगत चढाउन नपरेको बताए ।