सन्धिखर्कमा नेपाल राहत शिक्षक अर्घाखाँचीकाे चाैथाे जिल्ला अधिवेशन सम्पन्न (तस्बिर सहित )

सन्धिखर्क, अर्घाखाँची (अर्घाखाँचीडट्कम) । अर्घाखाँची जिल्लाको सन्धिखर्कमा नेपाल राहत शिक्षक अर्घाखाँचीकाे चाैथाे जिल्ला अधिवेशन सम्पन्न भएको छ ।

राष्ट्रिय सभाका सदस्य चन्द्रबहादुर खड्का उज्वलले शिक्षा क्षेत्रमा आमुल परिवर्तनको खाँचो औल्याउनु भएको छ । उहाँले मुलुकमा राजनीतिक परिवर्तन भएपनि समय सापेक्ष रुपमा शिक्षामा परिवर्तन हुन नसक्दा समस्या बल्झिएको बताउनुभयो ।

नेपाल राहत शिक्षक जिल्ला समिति अर्घाखाँचीको चौथो जिल्ला अधिबेशनको सन्धिखर्कमा उद्घाटन गर्दै उहाँले शिक्षा क्षेत्रमा थुप्रै समस्याहरु रहेको भन्दै शैक्षिक बिकृति र विसंगतिको अन्त्यको निम्ति नयाँ योजनाका साथ अघि बढ्नुपर्ने बताउनु भयो । नेपाली जनताको ठुलो त्याग र बलिदानका कारण मुलुकमा राजनीतिक परिवर्तन भएपनि आर्थिक,सामाजिक र सांस्कृतिक रुपान्तरणको अभावमा जनताले परिवर्तनको अनुभुती गर्न नसकेको बताउनुभयो । बिकास र समृद्धिको यात्रामा मुलुक अगाडि बढेको भन्दै उहाँले समृद्धिको मेरुदण्डको रुपमा रहेको शिक्षा क्षेत्रलाई समय अनुकुल बनाउनु पर्नेमा जोड दिनुभयो । नेपाल कम्युनिस्ट पार्टी नेकपाका नेता समेत रहनु भएका नेता खड्काले शिक्षा क्षेत्र लाई शैक्षिक माफियाहरुले घेराबन्दीमा पारेको बताउँदै माफियाको षड्यन्त्र चिरेर अगाडि बढ्न सरकारलाई आग्रह गर्नुभयो । उहाँले शिक्षकहरूको मनोबल माथि नउठाए सम्म शैक्षिक गुणस्तर कायम हुन नसक्ने भन्दै शिक्षकमा भएको विभेद अन्त्य गर्नुपर्नेमा जोड दिनुभयो । नेता खड्काले मुलुकमा रहेका ४० हजार राहत शिक्षकको व्यवस्थापनमा तत्काल ध्यानदिन राज्यको ध्यानाकर्षण गराउनु भयो ।