घरजग्गाको कारोवारमा ७० प्रतिशतको गिरावट / गाविसको जग्गा दर्ता शुल्क ५० प्रतिशत बढ्यो

राजधानी उपत्यकामध्ये काठमाडौका २३, ललितपुरका ११ र भक्तपुरका ८ गाविसमा जग्गा घरजग्गा किन्नेलाई अब ३ प्रतिशत रजिष्ट्रेशन दस्तुर लाग्नेछ। घरजग्गा कारोबार व्यवसायिक रुपबाट हुन थालेपछि सरकारले करको दस्तुर बढाएको हो।

‘घरजग्गा किनबेचलाई व्यवसायिक कारोबारका रुपमा लैजान थालेकाले करको दर बढाइएको हो,’ भुमी सुधार मन्त्रालयका एक अधिकारीले भने ‘पहिले घरजग्गा किन्नु बसोबासका लागि थियो, अहिले नाफा गर्नका लागि छ।’ उनले नाफाका लागि गरिएको कारोबारमा कर लगाउनु स्वभाविक रहेको बताए।

सरकारले रजिष्ट्रेसनबाट यो वर्ष ६ अर्ब ६० करोड रुपैयाँ राजस्व उठाउने लक्ष्य राखेको छ। गत वर्ष ६ अर्ब लक्ष्य राखेकामा ६ अर्ब ५ करोड संकलन भएको थियो।

कारोबारमा झनै गिरावट
काठमाडौं उपत्यकामा एक वर्षदेखि लगातार घटेको घरजग्गाको कारोवारले मंसिरमा पनि निरन्तरता पाएको छ।

भुमी सुधार तथा व्यवस्थापन विभागका अनुसार काठमाडौं उपत्यकाका ५ मालपोत कार्यालयहरुले मंसिरमा १३ करोड ३९ लाख रुपैयाँ रजिष्टे्रशन दस्तुर संकलन गरेको छ। गत वर्ष यी मालपोतले ४५ करोड रुपैयाँ राजस्व उठाएका थिए। यो गत वर्षको तुलनामा ७० प्रतिशतको गिरावट हो।

विभागका अनुसार गत वर्ष मंसिरमा १७ करोड १९ लाख रुपैयाँ उठाएको डिल्लीबजार मालपोतले यो मंसिरमा ५ करोड १७ लाख मात्र संकलन गरेको छ। यस्तै चावहिल मालपोतले मंसिरमा २ करोड ६८ लाख राजस्व संकलन गरेको छ। यो कार्यालयले गत वर्ष मंसिरमा ९ करोड ४१ लाख रुपैयाँ उठाएको थियो।

‘कारोवारमा ७०/७५ प्रतिशतले गिरावट आएकाले राजस्व पनि त्यसैअनुरुप घटेको हो,’ विभागका योजना तथा तथ्यांक अधिकृत राजु बस्नेतले भने ‘कारोबारमा सुधार नआएसम्म राजस्व बढन सक्ने देखिदैन।’