काठमाडौ – होलीको रौनकमा सहर रंगिनै लागेको बेला शनिबार गोदावरीस्थित अभिनेत्री करिश्मा मानन्धरको घरमा भने माहौल तात्तिइसकेको थियो । बिहानको ठीक ११ बज्दा करिश्माको आँगनमा होलीका लागि अनेक रंग र खानेकुराको परिकारसँगै आइटम गीतहरू बज्न थालिसकेका थिए र नेपाली फिल्मी दुनियाँका कलाकार, निर्देशकदेखि निर्मातासम्म उनको होली निम्तो मान्न तम्तयार थिए ।
नेपाली चलचित्रकर्मीलाई एकैथलोमा भेला पारेर पारिवारिक स्वादको होली मनाउने ध्येयले करिश्माले होलीको आयोजना गरेकी थिइन् । सौहार्दपूर्ण वातावरणमा एकअर्कालाई रंग दलेर बिहान ११ बजे सुरु भएको होलीमा रेखा थापा, रेजिना उप्रेती, नन्दिता केसी, नरेश पौडेल, ऋचा घिमिरे, राजबल्लभ कोइराला, सुषमा कार्की, जेनी कुँवर, सोभित बस्नेत, दीपक-दीपाश्री, राजेन्द्र खड्की, निरज बराल, निर्मल शर्मा, जेनिसा हमाल, दिनेश डीसी, नलिना चित्रकार, प्रेमराजा महत, किरण केसी, रमिला अधिकारीलगायतका नयाँ-पुराना चलचित्रकर्मी र गायक-गायिका थिए ।
सफ्ट डि्रंक्सदेखि वाइन र हार्ड डि्रंक्ससम्म व्यवस्था गरिएको होली माहौलमा प्रायः अभिनेत्रीहरूले वाइन र अभिनेताहरूले चाहिँ हार्ड डि्रंक्स्का गिलास उचाले । गाना-बजानामा प्रायः सबै रमे । नेपाली गीत ‘होलीले रंग्यायो मेरो नयाँ चोली…’, ‘तिलहरी’ फिल्मको ‘होरिया होरिया हो रंग…,’ हिन्दी आइटम नम्बर ‘मुन्नी बदनाम हुई…’ र ‘शिला के जवानी…’ ले माहौल तताए । पत्रकारहरू सोधिरहेका थिए, ‘नेपाली होलीमा नेपाली गीत किन बजाइँदैन ?’ कलाकार जवाफ दिन्थे, ‘नेपाली गीत त भए पो ?’
सबैभन्दा बढी रंग छ्याप्नेमा अभिनेत्री सुषमा कार्की र करिश्माकी छोरी कविता थिइन् । यी दुईले सबैलाई लखेटीलखेटी रंग घँस्थे, पिचकारी र लोला हान्थे । अरूहरूले रंग घस्न आउँदा रेजिनाले बचावटका लागि निर्देशक सोभितको नाम लिन्थिन् । नाच्दै गर्दा किरण केसीले रेजिनालाई च्याप्प समाएर जुरुक्क उचाले । राजेन्द्र खड्की र सुषमाको नृत्यमा सबैले आँखा पथ्र्यो । दिनेश डीसी पनि बेला-बेला र्याप हान्थे ।
लगभग दुई बजेतिर करिश्माको आँगनमा बर्थडे केक देखियो, विनोद मानन्धरले सबैलाई सरप्राइज दिँदै आफ्नो बर्थडे घोषणा गरे । केक काट्दै पहिले पत्नी करिश्मा र छोरी कवितालाई खुवाए । धेरै सोधनी भए पनि विनोदले उमेर चाहिँ बताएनन् । साँझ ५ बज्दै गर्दा पनि त्यहाँ कलाकारहरू आइरहेकै थिए । सबैभन्दा बढी फसाद ट्राफिक प्रहरीलाई । कलाकारको गाडीले गर्दा करिश्माको घर आसपासको गोदावरी बाटो लामो समय जामै गर्यो ।
प्रायः सबै कलाकारले होलीको जमघटलाई प्रशंसा गरे । ‘कलाकारहरू एउटै परिवारमाझैं यसरी होली मनाएको क्षण सधंैका लागि अविस्मरणीय हुनेछ,’ बिहान ११ बजेदेखि साँझ ५ बजेसम्मै बसेकी रेखाले भनिन्, ‘यसले कलाकर्मीलाई बेग्लै ऊर्जा दिएको छ ।’
रेजिनाले ‘रियल लाइफमा होलीको पहिलोपटक यति धेरै मज्जा बटुलेकी’ अनुभव सुनाइन् । ‘तीन/चारवटा होलीमा गएर १०/१० मिनेट मात्रै बसेर आएँ, यहाँचाहिँ दिनभर नै बस्छु’ भन्दै माहौलमा रमेका प्रेमराजा महत पनि साँझसम्मै जमे । निर्देश नरेश पौडेलले ‘यस्तो भावनात्मक र रमाइलो होली संस्थागत भएको भए झन राम्रो हुन्थ्यो भन्दै करिश्माको खुलेर प्रशंसा गरे ।’
‘जमघट नभएको लामो समय भएको थियो,’ करिश्माले भनिन्, ‘एउटा आत्मीय भेटघाटका लागि होलीलाई रोजेकी हुँ ।’
चैत्र ७ गते, २०६७ मा प्रकाशित
