बैशाख १६ गते, २०६८ मा प्रकाशित
लण्डन – बेलायती राजकुमार विलियम्स र केट मिडलटनबीच शुक्रबार एक भव्य समारोहबीच विवाह भएको छ ।
राजकुमारको विवाह समारोह विश्वभरका दुई अर्बभन्दा बढीले हेरेको समाचार संस्था एपीले जनाएको छ । राजकुमार विलियम्सले आफ्नो प्रेमलाई विवाहमा रुपान्तरण गरेका हुन् । विवाह समारोहमा १ हजार ९ सयलाई बोलाइएको थियो ।
यसैबीच राजकुमार विलियमलाई डयुक अफ क्याम्ब्रिजको उपाधी शुक्रबार उनको विवाहको दिन प्रदान गरियो भने केट मिडल्टनलाई विवाहपछि डचेज अफ क्याम्ब्रिजको उपाधी दिइएको बेलायतको बकिङघम् राजप्रासादले जनाएको छ ।
आफ्ना नाती प्रिन्स अफ वेल्स राजकुमार विलियमलाई बेलायतकी महारानी एलिजावेथले ड्युकको उपाधी प्रदान गरिन् भने अब उनको उपाधीहरू ड्युक अफ क्याम्ब्रिज, अर्ल अफ स्ट्राथर्न र व्यारोन क्यारिकफर्गस हुनेछ ।
राजप्रासादका अनुसार अब राजकुमार विलियम अधिराजकुमार ड्युक अफ क्याम्ब्रिज हुनेछन् भने सुश्री क्याथरिन् मिडल्टन् विवाह गरेपछि अधिराजकुमारी डचेज अफ क्याम्ब्रिज हुनेछिन् । विलियमको क्ल्यारेन्स हाउसका प्रवक्ताले पनि विलियम सम्मानित भएको पुष्टी गरे ।परम्परागत रुपमा शाही दुलहाले विवाहको दिन कम्तीमा एउटा उपाधी पाउँछन् र दुलहीले सो उपाधी स्वतः ग्रहण गर्छन् । डचेज हुनुका अतिरिक्त केट मिडल्टन् भने प्रिन्सेस अफ विलियम अफ वेल्स हुने परम्परा छ ।
बेलायतको राजगद्दीका उत्तराधिकारी विलियम्सले सहपाठी तथा प्रेमिका मिडलटनसँग बिहे गर्न लागेका हुन्। उनको बिहेसम्बन्धी समाचारलाई अन्तर्राष्ट्रिय सञ्चार माध्यमले प्राथमिकतासाथ प्रसारण गरेका छन्।
निम्ताका विषयमा विवादमा परेका बेलायतमा पूर्वप्रधानमन्त्रीहरू टोनी ब्लेयर र गोर्डन ब्राउनलाई भने बिहेमा बोलाइएको छैन। विपक्षी लेबर पार्टीका नेताहरूले यसमा असन्तुष्टि व्यक्त गरेका छन्।
बेलायतका लागि सिरियाली राजदूत डा. सामी खियामीको निम्ता पनि रद्द गरिएको छ। सिरियाको प्रजातान्त्रिक आन्दोलनमा सरकारले दमन गर्दा ४ सय ५० प्रदर्शनकारी मारिएको भन्दै उनको उपस्थिति अस्वीकार्य रहेको बताइएपछि राजदरबारले निम्ता रघ गरेको हो।
राजकुमार विलियम्स तथा मिडलटनले कुरा छिनिएयता मानिसहरूले देखाएको स्नेहले धेरै उत्प्रेरित भएको बताएका छन्। बिहेसम्बन्धी जानकारी दिने औपचारिक वेबसाइटमा उनीहरूको सन्देश राखिएको छ।
वैवाहिक कार्यक्रम हेर्न राजधानी लन्डनको सडकमा ६ लाखभन्दा बढी मानिस सडकमा भेला हुने अनुमान गरिएको छ। धेरै मानिसहरू बिहीबार रातिदेखि नै विवाहस्थल र दरबारअगाडि बस्न थालिसकेका छन्। सरकारले बिदाको घोषणा गरेको छ। समारोहमा ४८ करोड अमेरिकी डलर खर्च हुने अनुमान गरिएको छ। मनी सुपर मार्केट डट कमले गरेको गणनाअनुसार प्रत्येक बेलायतीको भागमा बिहेको २९ डलर खर्च पर्ने छ।
अन्य समाचारहरु
