चैत्र ३० गते, २०६८ मा प्रकाशित
सन् २०१२ मा नेपालको आर्थिक बृद्धिदर साढे चार प्रतिशत पुगे पनि आगामी बर्ष भने चार प्रतिशतमा सिमित रहने छ । एसियाली विकास बैंक एडिबीले बुधबार सार्वजनिक गरेको एशियाली विकास परिदृष्य (एडिबी आउटलुक २०१२) ले उक्त प्रक्षेपण गरेको हो । कृषि तथा सेवा क्षेत्रमा आएको सुधारले साढें चार प्रतिशतको आर्थिक बृद्धि हासिल हुने जनाइएको हो । वर्तमान परिवेस र औसत मौसमका आधारमा आगामी बर्ष २०१३ मा भने आर्थिक बृद्धि केही खुम्चने बैंकले जनाएको हो । साथै बैंकले यो बर्ष मुद्रास्फिति आठ प्रतिशत पुग्ने र अर्को बर्ष भने केही सुधार भएर सात प्रतिशतमा सिमित हुने पनि जनाएको छ । यो बर्ष पनि नेपालको व्यापार घाटाको खाडल अझै बढ्ने देखिएको छ । तर रेमिट्यान्समा जारी रहने बृद्धि, पर्यटन आयमा आउने सुधारले चालु खाता भने बचतमा रहने एडिबीको प्रक्षेपण छ ।
प्रतिवेदनले विकासोन्मुख एशियाको बृद्धिदर मन्द तर स्थिर रहने देखाएको छ । बैंकले विकासोन्मुख एशियामा कूल गार्हस्थ उत्पादन बृद्धिदर २०१२ मा ६ दशमलब नौ प्रतिशतमा सिमित रहने तर २०१३ मा ७ दशमलब तीन प्रतिशतसम्म पुग्ने अनुमान गरेको हो । यस क्षेत्रमा सन् २०१२ मा कमजोर बाह्य मागको भार पर्ने जनाइएको छ । तर अधिकांश अर्थतन्त्रमा बृद्धिदर सुदृढ रहने र २०१३ मा निजी खपत बढेर फेरी सशक्त हुने प्रतिवेदनले जनाएको हो । संसारकै दोश्रो ठूलो अर्थतन्त्र चीनले २०१२ मा साढें आठ प्रतिशत र २०१३ मा आठ दशमलब सात प्रतिशतको बृद्धि सहित यस क्षेत्रकै अगुवा गर्ने एडिबीको प्रक्षेपण छ । २०११ मा चीनले ९ प्रतिशत बढीको उच्च आर्थिक बृद्धि हासिल गरेको थियो ।
अन्य समाचारहरु
