काठमाडौं महानगरपालिका र ललितपुर उपमहानगरपालिकाले घरजग्गाको डिजिटल नक्सा उपलब्ध गराउने

महानगरका कार्यकारी अधिकृत केदारबहादुर अधिकारीले माघको पहिलो सातासम्ममा प्रत्येक नगरवासीले घरको नक्सा पास गर्नुपरेमा अनलाइनबाट आवेदन दर्ता गरी डिजिटल नक्सा प्राप्त गर्ने उनले बताए । डिजिटल नक्साका लागि यूनडीपीले आर्थिक ताथ प्राविधिक सहयोग गरेको छ ।  छ महिनाभित्रै प्रथम चरणको काम गरी यूनडीपीले महानगरलाई बुझाउने उनले बताए । डिजिटल पद्धतिबाट भवनका नक्सा निर्माण गरेपछि भवनको डिजाइन कसैले परिवर्तन गर्न सक्ने छैनन् । 

हाल महानगरले पास गरेको नक्साविपरीत सहरभित्र भवन निर्माण हुँदै आएका छन् । महानगरले दिएको नक्साविपरीत भवन निर्माण भएको भन्दै उनले यो पद्धति लागू गर्ने बताए । सहरी विकास महाशाखाका प्रमुख उत्तर रेग्मीले नक्साका फाइल हराउने, समयमा नक्सा पास नहुने झन्झटबाट नगरवासी मुक्त हुने बताए । करको दायरामा पनि सजिलै ल्याउन सकिने उनको भनाइ थियो । करदातामा पनि भेदभाव नहुने उनको भनाइ थियो ।

हाल महानगरमा दस हजार घरधनीको मात्र तथ्यांक छ । त्यसका लागि यूनडीपीले करिब पाँच करोडको आर्थिक सहयोग गर्न लागेको उनले बताए । ‘नेपालमा त यो पहिलोपटक हो,’ उनले भने । म्याग्लोर लगायत भारतका केही सहरमा मात्र यो पद्धतिबाट घरजग्गा पास गर्ने प्रविधि भएको उनले बताए । ललितपुर र काठमाडौंमा पहिलो चरणमा परीक्षणरूपको योजना लागू गरिँदैछ । यो सफल भएपछि अन्य सहरमा सरकारले लागू गर्ने जनाएको छ ।

सेवाग्राहीले महानगरमा नआई घरबाटै आफ्नो घर जग्गा र सम्पत्ति विवरण प्राप्त गर्न सकिने उनको भनाइ थियो । पहिलो चरणमा दस हजार घरजग्गाको तथ्यांकलाई अपडेट गरिने उनले बताए । दोस्रो चरणमा एक लाख बीस हजार घरलाई अपडेट गरिने छ । प्रत्येक वर्ष महानगरमा पाँच हजार नयाँ घर निर्माण हुँदै आएका छन् । अहिले हस्तलिखित नक्सालाई पास गर्ने चलन छ । यसो गर्दा अनियमितता हुने गरेको महानगरका पदाधिकारीहरू बताउँछन् ।